هند او پاکستان د لوړې کچې خپلمنځي خبرې سره کوي

Image caption د ممبيي له بريدونو وروسته د هند او پاکستان د سولې خبرې اترې څو ځله ځنډېدلې وې.

د پاکستان او هند د بهرنيو چارو وزيران په اسلام اباد کې سره جرګه کېږي چې د ممبيي له بريدونو راوروسته د سولې ځنډېدلې خبرې له سره پېل کړي.

ويل کېږي د دواړو لورو تر منځ د خبرو اصلي موضوع د ترهګرۍ مسله ده .

هند ټينګار کوي چې پاکستان بايد په 2008 کال کې د هند په سوداګريز ښار ممبيې کې شويو بريدونو کې لاسلرونکي و نيسي او د قانون منګلو ته يې وسپاري.

په دغو بريدونو کې اسلامپالو وسله والو تر يو سلو شپېتو زيات کسان ووژل.

د ممبيي بريدونو څو ځله د دواړو هېوادونو ترمنځ خبرې ګډوډې کړې او هند پاکستان تورنوي چې د هغو اورپکو پر ضد ډېر څه نه کوي چې پر هند د بريدونو لپاره په پاکستان کې پلانونه جوړوي.

دغه راز ويل کېږي چې پاکستان به له هند سره د اوبو د منابعو د شراکت خبره مطرح کړي چې پاکستان فکر کوي هند وړاندې له دې چې سيندونه پاکستان ته ور داخلېږي اوبه يې هند ترې اړوي.

د هند د بهرنيو چارو وزير اس ام کريشنا وايي د دواړو هېوادونو تر منځ ډېرې لانجمنې مسلې شته چې هواري لارې چارې غواړي.

ښاغلي کريشنا وويل چې پاکستان ته يې د سولې پيغام راوړی دی .

په 2008 کال کې د هند په تجارتي مرکز ممبيې کې د ترهګريزو بريدونو له امله هند له پاکستان سره د خبرو پروسه ځنډولې وه .

څارونکي وايي چې دواړه هېوادونه د امريکا فشار خبرو ته اړ کړي دي .

ها خوا پوليس وايی د سوات درې د مينګورې په ښارګوټي کې يوه بس سټشن ته څېرمه چاودنه کې درې کسه وژل شوي .

رپوټونه وايي په پېښه کې تر دېرشو نور ډېر ژوبل دي.