لندن کې د ترهګرۍ غندلو اسلامي کنفرانس جوړېږي

ډاکټر طاهر القادري
Image caption ډاکټر طاهر القادري وايي، دغه کنفرانس به دا پیغام ولري چې ''له لس کلنې سخت دريځۍ وروسته، باید نوره سخت دريځي ورکه شي.''

د ''منهاج القرآن الإسلامية'' ډله تمه کوي چې شاوخوا ۱۲ زره مسلمانان به د لندن په ویمبلي کې د ''سوله د انسانیت لپاره'' په نامه کنفرانس کې سره راغونډ شي.

په پام کې ده چې د ۲۰۱۲ کال په راتلو سره به، دغه کنفرانس د انټرنېټ له لارې د خلکو د هڅولو یو داسې کمپاین پیل کړي، چې شعار به یې '' د سولې اعلان'' وي.

ډاکټر طاهر القادري وايي، دغه کنفرانس به دا پیغام ولري چې ''له لس کلنې سخت دريځۍ وروسته، باید نوره سخت دريځي ورکه شي.''

د ویلو ده چې القادري د منهاج القرآن ډلې بنسټګر دی، چې د جوړېدونکي کنفرانس اصلي ویندويي یې هم پرغاړه اخیستې ده.

یوه ديني عالم بي بي سي ته وویل، په دې کنفرانس سره به د سپتمبر د یوولسمې یاد تازه کړل شي او دا پیغام به خلکو ته ورسول شي چې انسانان باید د سخت دريځۍ پرضد یو موټی شي.

دی زیاتوي''موږ باید په ګډه د اسلامي ترهګرۍ پرضد سره یو شو، چې په دې سره به سوله، مینه او ورورګلوي راشي. ''

محمد طاهر القادري

نوموړی د ۱۹۵۱ د فبرورۍ پر ۱۹مه زیږېدلی، اصلي ټاټوبی یې پاکستان دی، چې دا مهال په لاهور کې د منهاج نړیوال پوهنتون هم چلوي.

طاهر القادري د ۲۰۰۹ د مارچ پر دویمه په لندن کې د یوه خبري کنفرانس له لارې ځانمرګي برید کوونکي (انتحاریان) ''نامسلمان او زندیق (کافر) بللي دي.''

نوموړي په دې اړه یوه ۶۰۰ مخیزه فتوا هم خپره کړې، او د القاعدې شبکه یې ''پخوانی شر، په نوي نامه'' سره یاد کړې ده.

ورته مطالب