د مالدیپ ولسمشر له خپلې دندې استعفا وکړه

محمد نشید
Image caption محمد نشید له ۲۰۰۸ کال راهیسې د مالدیپ ولسمشر و.

هغه خپله استعفا وروسته تر هغه د تلویزیون له لارې اعلان کړه، چې د یوه جګپپوړي قاضي د لېرې کولو له حکم سره لاریونونه وشول.

ښاغلي نشید لوړ پوړی قاضي د مخالفې سیاسي ډلې په ملاتړ تورن کړی چې مشري یې پخوانی ولسمشر محمد عبدالقیوم کوي.

اټکل کیږي چې د ولسمشر مرستیال به د چارو واګې په لاس کې واخلي.

تر دې وړاندې په راپورونو کې ویل شوي وو چې د یاغي پولیسو ډلې د هغه هېواد د تلویزیون ستیشن تر خپلې ولکې لاندې راوستی او پر ولسمشر محمد نشید یې غږ کړی وو چې له خپلې دندې لاس په سر شي.

د دوشنبې په ورځ شاوخوا پنځوس پولیسو د حکومت له امر سرغړونه وکړه چې د پخواني ولسمشر محمد عبدالقیوم د پلویانو د لاریون مخه ونیسي.

حکومت له دې انکار کوي چې پر لاریون کوونکو پولیسو یې د ربړي ګولیو د ویشتلو امر کړی دی.

د قاضي نیول

ولسي لاریونونه تر هغه وروسته ډېر شول، چې پوځ تېره میاشت یو قاضي (عبدالله محمد) ونیو.

حکومت وايي ددغه قاضي د ځينو پرېکړو ترشا سیاسي انګیزه وه.

د حکومت په وینا، د حکومت مخالفي فعال په خوشي کولو سره د مالدیپ د قضايي سیستم په نا پيېلي توب شکونه راپیدا شول.

په سیمه کې د بي بي سي خبریال چارلز هفلاند وايي، اساسي قانون تر ۲۰۰۸ ټاکنو وروسته محمد نشید ته دا حق ورکړ چې واک ته ورسېږي.

محمد نشید تر هغه مخکې د بشري حقونو په برخه کې یو فعال و.