لاوروف: ولسمشر اسد د زورزياتي پای ته رسولو ته ژمن دی

اسد لافروف د انځور حقوق Reuters
Image caption ښاغلي لافروف په دمشق کې له ولسمشر اسد سره خپلې خبرې ګټورې وبللې دي. دا په داسې حال کې چې په حمص کې بيا جګړه روانه ده.

د روسيې د بهرنيو چارو وزير سرګې لاوروف په دمشق کې د سوريې له ولسمشر بشار الاسد سره خبرې کړې دي.

ښاغلي لاوروف دغه خبرې ګټورې بللې دي.

د روسيې د بهرنيو چارو وزير سرګې لاوروف په داسې وخت کې دمشق ته ورسېد چې د بشار الاسد پلويانو له خوا يې بيرغونه په لاس هرکلی کېده.

هغه وېټو چې روسيې او چين د ملګريو ملتونو امنيت شورا کې وکاروله، د بشار الاسد پر نظام يې د فشار زورکم کړی دی.

پر لوېديځوالو سربېره د سوريې ګاونډيان هم په غوسه دي.

د ترکيې لومړي وزير رجب طيب اردوګان چې په انقره کې يې خبرې کولې، د روسيې او چين وېټو کارونه د متمدنې نړۍ پاتې راتلنه وبلله.

ده وويل ترکيه خپل وړانديزونه چمتو کوي.

ترکيه د سوريې جلاوطنو مخالفانو او د سوريې له پوځ بېلو شويو افسرانو کوربه ده.

خو په دمشق کې ښاغلي لاوروف ولسمشر اسد ته په دې وينا د لا نور ملاتړ اشاره ورکوله، چې ګنې د سوريې مشر د وينې توينې پای ته رسولو ته ژمن دی:

"موږ پر دې ټينګار کړی د هغه څه پر بنسټ چې د عربي ټولنې د تېر کال نومبر دويمې په وړانديز کې ځای شوي، څومره ژر چې وي، د دغه کړکېچ پای ته رسولو کې هر ډول مرستې ته چمتو يو.

په تېره بيا لکه څنګه يې چې مخکې ياد شوی وړانديز په ډاګه کوي، د سوريې ولسمشر راته ټينګار وکړ تاوتريخوالی چې له هرې خوا وي، دی يې پای ته رسولو ته ژمن دی."

ښاغلي لاوروف وويل حل لاره بايد د عربي ټولنې د نومبر دويمې پر وړانديز ولاړه وي، چې د سوريې له واکمن نظام نه غوښتنه کوي، له ښارونو دې ځواکونه وباسي، بنديان دې خوشي کړي او له مخالفانو سره دې خبرې پيل کړي.

ده وويل سوريه د يو نوي اساسي قانون په اړه ټولپوښتنې ته چمتو ده:

" ولسمشر اسد راته وويل په راتلونکو ورځو کې له هغه کمیسيون سره ګوري چې د نوي اساسي قانون مسوده يې چمتو کړې ده.

کار بشپړ شوی او کله چې د نوي اساسي قانون مسوده ولسمشر ته وسپارل شي، نو د سوريې د مهم نوي بسنټيز قانون په اړه به د ټولپوښتنې وخت هم اعلان شي.

د سوريې د دغه نوي بنسټيز قانون له مخې به ټولټاکنې ترسره کېږي، چې د ګوندونو د نوي قانون له مخې به په کې ګڼ شمېر ګوندونه برخه اخلي.

لکه چې ومې ويل ټاکنې د نوي اساسي قانون له مخې ترسره کېږي، چې له دې وروسته بعث ګوند ته کوم امتياز يا ګټه نه ورکوي"

خو ښاغلي لاوروف د عربي ټولنې د دې خبرې يادونه ونه کړه، چې د واک لېږدونې يوې برخې په توګه له ولسمشر اسد د دندې پرېښودو غوښتنه کوي.

په ملګرو ملتونو کې روسانو ويل دوی د نظام بدلونې پر ضد دي.

پر دمشق د خليج فشار

اوس په داسې حال کې د روسيې د بهرنيو چارو وزير د سوريې نظام ته د ملاتړ ټټر واهه، چې د دمشق مخالفو خواوو بيا د لا نور فشار راوړنې پر لار ګامونه اخيستل.

د سعودي په مشرۍ د خليج عربي هېوادونو ويلي دوی د سوريې سفيران شړي، او هم خپل سفيران ورستنوي.

خو ولسمشر اسد د نژدې راتلونکي په اړه کېدی شي لا باوري احساس وکړي.

دی د خپل تر ټولو مهم ملګري له لوري د ملاتړۍ سفر ليدونکی و، او په همدې وخت کې يې د عربي ټولنې او لوېديځو ځواکونو د ګډ ډيپلوماټيک زور مقاومت هم وکړ.

په دمشق کې د سرګې لافروف خبرو او لاسته راوړنو ته په غبرګون کې امريکا ويلي دوی د نوموړي سفر ته په شک ګوري.

د سپينې ماڼۍ وياند جې کارني وويل پر ولسمشر اسد تکيه ناکامه تګلاره ده:

"موږ په دې اړه باوري نه يې چې د ده د ليدنې موخې څه دي.

څه چې موږ يې دلته يادونه کوو، دا دي، روسيه بايد پوهه شي چې پر اسد د هر څه شرط وهنه يوه ناکامه تګلاره ده.

نه يوازې په سوريه کې د روسيې د ګټو په اړه، بلکې د دغې سيمې د ارامۍ او د سوريې د راتلونکي په اړه هم"

په همدې مهال د سوريې پوځ پر حمص ښار د د هاوانونو او توپونو بريدونه روان ساتلي دي.

دغه بريدونه داسې ښکارېدل چې د حمص بابا عمرو سيمه يې په نښه کړې وي.

د بي بي سي يو خبريال چې په حمص کې دی، وايي لا ډېر وګړي اوس خوړو او د ژوند نورو اړينو توکيو ته لاسرسي کې له ستونزو سره مخامخ دي، او هر څوک چې له دغه ښاره د وتلو هڅه وکړي د واکمن نظام نښه ويشتونکيو له خوا پرې ډزې کېږي.

ورته مطالب