د بشر نويد کالم پښتونخوا: د وېلنټانن روح په پښتونخوا کې!!

د انځور حقوق
Image caption د وېلنټائن روح د هېبته واپس تاوٴ شو په تلو تلو کې يې وويل!! ای د پښتونخوا عاشقانو!!

د فبرورۍ ۱۴مه د وېلنټاین روح له لېواله محبت سره وګرځېد، چې د خپلې مينې داستان تازه کړي.

د اروپا په سپينو لاسونو کې يو بل ته ګلابونه ورکړل شول، په مستو ساحلونو ښکلاګانو يو بل ته وېلنټاین راياد کړو.

کوترې والوتې لکه چې د محبت جشن لمانځي، دوه سترګې څلور شوې، په شونډو مسکاګانې خورې ورې شوې، يو ګلاب بل ګلاب ته وویل!!

I Love You

د ګلوبل ويلج (نړیوال کلي) د تهذيبونو په تبادله کې دا ځل وېلنټاین د تهذيبونو له ټکر سره مخامخ شو د محبت لېواله عاشقانو وویل!!

ما له ګلاب راکا...... ما نه ګلاب واخله

زهٴد وېلنټاین ورځ کې خپل محبت لمانځم؛ ځکه چې محبت هېڅ سرحد، ژبه، قام، مذهب نهٴلري، محبت بس محبت دی، د دوو زړونو او دوو سترګو يو لوی جهان دی.

مذهب پرستو وویل!!

دا د غېر مذهبو رسم دی. زما په مذهب کې دا ورځ زما له تهذيب سره متصادمه (په ټکر کې) ده. زما مذهب وايي چې د کال دوولس مياشتې دې زهٴ مينه وکړم، يوه ورځ محبت څهٴمعنا!!؟

د ميډيا ښاغلو وویل!!

محبت خو محبت دی، د ګلوبل ويلج د تهذيبونو د تړون نوم وېلنټاین ډې (ورځ) ده!!

دا يو ګلاب د وېلنټاین د ورځې په نامه د امن او محبت پېغام دی.

ترهګرۍ او بې روزګاره متاثرينو د خپل وطن د سياسي، معاشي ، اقتصادي، بدحالۍ په يوه ستړي غږ کې وویل!!

اور بھی غم ہیں زمانے میں محبت کے سوا

راحتیں اور بھی ہیں وصل کی راحت کے سوا

ډېرې خولې ډېرې خبرې، خو يو د وېلنټاین ناقراره روح!!

چېرته ګلاب او چېرته ازغي او يو انسان څو څو ځايه تقسيم!!

لکه د ټولې دنيا يوه زبرګه کوتره، چېرته يو شان چېرته بل شان، هلته د خلکو خوا کې په ساحلونو بې وېرې ترهې ګرځي، دلته د امن په نوم هم کهٴپه هوا کې الوځولى شي نو سترګې یې اوترې وې او له وېرې رپي.

په ټوله دنيا کې يو محبت، يو د وېلنټاین په نوم سپين ګلاب، بل د وينو په ډنډ کې پاڼې پاڼې!!

چېرې محبت يو بل ته غږ کوي، دلته محبت جرم سزا، د غېرت په نوم قتل، او د انساني حقوقو د علمبردارانو د يوې ورځې احتجاج او د هغوى په فايل کې د يو بل ناکام محبت په نوم اضافه!!

د ''حيا'' ورځ

دا ځل وېلنټاین ورځ ته نړيوالو مسلمانانو پښتنو افغانانو د ''حيا'' د ورځې نوم ورکړو، محبت له کهٴ څوک هر څهٴ نوم کېدى خو محبت به محبت وي، خبره د وېلنټاين د ورځې په مناسبت يو بل له د ګل ورکولو نهٴ ده، د تهذيبونو د تصادم خبره ده، بهر دنيا کې په حجاب بنديز ولګېد، دا د مسلمانانو په تهذيب باندې حمله ده. چې دا ځل وېلنټاين ورځ باندې يو بل له د ګل ورکولو رِسم ياد شو نو موږ وویل!!

دا زموږ تهذيب نهٴدی!!

د تهذيبونو په تصادم کې محبتونو سره هم دغه شان سلوک کېږي، خو موږ د دې ټولو اختلافاتو باوجود د نورو تهذيبونه قبلوو.

زموږ په تهذيب کې د وېلنټائن نه زوراۤور داستانونه شته، خو موږ يې د بدنام محبت په نامو يادوو، موږ په څهٴ عجيبه تهذيب کې ژوند کوو، محبتونه منو هم او بدناموو يې هم!!

په داسې حالاتو کې د وېلنټائن د ورځې ګلاب هم دلته د فحاشۍ په زمره کې راغی، داسې لکه د طالبانو په دور کې په کابل کې سندره فحاشه او په پښتونخوا کې د اېم اېم اې په دور کې سندره قېد بامشقت قيدي!! بيا په سوات کې سندره ان لکه د مېمونۍ حلاله!!

په دغه رنګ حالاتو کې د وېلنټائن روح پښتونخوا ته راغی!!

د وېلنټائن استقبال ته د پښتونخوا د لېواله ناکامه محبتونو عاشقان ولاړ وهٴ. ادم خان درخانۍ، موسٰى خان ګل مکۍ، نازو قطب خان، يوسف خان شېربانو، توردل او شهۍ يو لوی قطار کې ټولو عاشقانو وېلنټائن ته وویل!!

ستا محبت نن په ټوله دنيا کې ستا د ورځې په نامه يادېږي ځکه چې ستا د وطن جنګ او محبت دواړو کې هر څهٴ روا دي، زموږ د وطن په جنګ او محبت کې هم زموږ روايات دي او زموږ روايات زموږ د محبت په ضد دي.

وېلنټائن ورته وويل!!

ای زما د عاشقانو د قبيلې خلکو!!

تاسو سره په داسې ورځ هم ګل نشته!!؟؟

زما د پښتونخوا عاشقانو ورته په جواب کې وويل!!

Image caption ما له ګلاب راکا...... ما نه ګلاب واخله

زموږ د وطن د سپرلو مزاج او فطرت بدل دی، زموږ ګلابونه هم د غلامو موسمونو پېدواښت دی. چېرته چې ماليار غلام، باغ پردی، موسم وېرې نيولی، هوا لشې لشې، په ځمکه شر او په اسمان کې تندرونه وي هلته محبت څهٴ او د محبت دستور څهٴ حېثيت لري؟؟ زموږ په وطن کې خو محبت داسې تنده غرى، لکه په اوبو کې تږى!! ګل په ډنډر کښې داسې ولاړ لکه پیمخى ځوان د جنګ په ميدان کې حيران ولاړ ځان سره وايي!!

دا زهٴ د مينې په نوم جنګ له پېدا شوی يم!!؟؟

ای د وېلنټائن ناقراره روحه!!

زموږ د عشق قبيله يوه ده، خو زموږ د محبت دستور جُدا جُدا دی، زموږ د زړونو درزا يوه ده، خو زموږ د سترګو حيا د يو بل نه مختلفه ده، زموږ تنده يو شان ده، خو ستا جام د زرو زما د څښکو لپه خيرنه!!

ستا سپرلى هم نازولى خو زما د سپرلى ګلابونه، رامبېل چامبېل، ريدي او غاټول اوس هم د وينو په ډنډ کې ولاړ دي، ستا د وطن يو موسم دی هٴ څلور موسمونه لرم خو بيا هم ستا د ورځې د پاره يو ګل نهٴ لرم.

زموږ او ستا د محبت فقط يو مزاج يو دستور مشترک دی، او هغه ستا او زموږ مرګ دی، تاله هم په ژوندون چا د محبت حق نهٴ درکاوه، موږ هم په محبت کې بدنام!!

نن ستا د ورځې په نامه د نوي دور باجراته عاشقان په کال کې يو ورځ محبت تازه کوي، زموږ په قبرونو درب ولاړ دى، ورک بې نشانه بې کتبي نامعلومه قبرونه دي.

وېلنټائن په افسوسناک لهجه سوال وکړ، ای عاشقانو ستاسو هېڅوک نشته!!؟

د پښتونخوا عاشقانو ورته وويل!! زموږ د يادولو لپاره د پښتو شاعران پاتې دى، هغوى مو يادوي، خو فقط د خپلو غزلونو د رديف او قافيې لپاره!! زموږ د محبت بلها نسل اوس هم پېدا کېږي خو د غريب وطن محبتونه هم د غربت له لاسه مري.

نقاب پوش هم کفن پوش هم

اوس خو زما په وطن کې خلک محبتونه حلالوي، مرۍ ترې پرې کوي، په چوکونو کې يې ځړوي، بلها د محبتونو منصوران اوېزاند دى. زما د وطن محبتونه نقاب پوش هم دى کفن پوش هم!!

تهٴد خپلې ورځې په نامه ګل غواړې، زما ځمکه سوزي، په لمبو کې سپرلى څهٴکوي؟؟؟

د وېلنټائن روح د هېبته واپس تاوٴ شو په تلو تلو کې يې وويل!!

ای د پښتونخوا عاشقانو!!

زهٴ تاسو ته سلام کوم چې په داسې دوزخ کې هم محبت کوئ

بغير سپرلى ګل پېژنئ او د لمبو نه ګلابونه جوړوئ!!!

بايد چې ټوله نړۍ ستاسو پښتون افغان محبت ته سلام او احترام ووايي.

ورته مطالب