سوريه کې د څارونکو دنده پاى ته ورسېده

د خپريدو وخت: 10:20 گرینویچ - جمعه 17 اگست 2012 - 27 زمری 1391

امنيت شورا په سوريه کې د خپل ماموريت د غځولو لپاره دوه شرطونه ايښې و.

د ملگرو ملتونو امينت شورا په سوريه کې د خپل پوځي څارونکو د ايستلو پرېکړه په رسمي دول اعلان کړه.

د دغه ماموريت وروستۍ نېټه د يکشنبې د ماخستن پر ١٢ بجو پاى ته رسيږي.

د امينت شورا دغه ماموريت د سولې د پلان يوه برخه وه چې د ځانگړي استازي کوفي عنان له خوا وړاندې شوى وو.

ښاغلي عنان دوې اوونۍ وړاندې له دې دندې استعفا وکړه.

امنيت شورا په سوريه کې د خپل ماموريت د غځولو لپاره دوه شرطونه ايښې و.

د ملگرو ملتونو امنيت شورا ريس جرادارود وويل چې دغه دواړه شرطونه نه دي پوره شوي.

د امينت شورا له خوا له سورېې څخه د پوځي څارونکو د ايستلو پرېکړه ناڅاپي نه ده، او دا جوتوي چې د ملگرو ملتونو سوله ساتي هدفونه هلته ناکامه شوي دي

امنيت شورا خپل څارونکي سورېې ته واستول چې د هغه اوربند څارنه وکړي چې د کوفي عنان په مټ رامنځ ته شو خو ونه پاېدى.

دغه څارونکي د مخ په زېاتېدونکي تاوتريخوالي له امله له سوريې څخه وځي ځکه چې نور د دوى لپاره ممکنه نه ده خپله دنده په سمه توګه پر مخ بوځي.

اوس ملگرو ملتونو پرېکړه کړې ده چې په سوريه کې يو سياسي دفتر پرانيزي چې د ټولو خواوو سره تماس وساتي او د هغې ورځي لپاره چمتو وي چې ښايي شرايط د سولې د خبرو لپاره اجازه ورکړي.

د ملگرو ملتونو يو جگپوړي چارواکي ايدموند مولت وايي په سوريه کې د ملگرو ملتونو حضور ضروري دى او زیاتوي دا روښانه ده چې په جگړه کې ښکېلي دواړه خواوې د جگړې لار خپله کړې ده او د سياسي روغې جوړې، تربگنې د درولو او منځگړيتوب لپاره ډېر لږ ځاى شته خو دا په دې مانا نه ده چې گواکې موږ له هر څه لاس په سر شو.

په سوريه کې به د نوي سياسي دفتر مشري يو نوي استازي ته وسپارل شي چې د کوفي عنان ځاى ناستی به وي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .