برتانيايي شهزاده او شهزادگۍ يوه مجله محکمې ته کشوي

د خپريدو وخت: 17:05 گرینویچ - جمعه 14 سپتمبر 2012 - 24 وږی 1391

د مجلې چلونکې وايي دغه شاهي جوړه " ان له کوڅې ښکارېدل".

فرانسوي مجله کلوسر (Closer) د مشهورو او نامتو کسانو عکسونه او د هغوى هغه کيسې خپروي چې عمومآ پټې وي.

همدې مجلې د برتانيا د ولي عهد د نږور شهزادگۍ کېت (کترېن مېډلټن) د ځيگر لوڅ عکسونه خپارۀ کړي او دا عکسونه يې پټ هغه مهال اخيستي چې شهزاده او شهزادگۍ په فرانسه کې په شخصي رخصتيو بوخت وو.

د برتانيا يوۀ سلطنتي وياند وويل دا قانوني گام په فرانسه کې پورته شوى او دليل يې دا دى چې د دوى پر محرميت يې يرغل کړى دى.

د مجلې چلونکې وايي دغه شاهي جوړه " ان له کوڅې ښکارېدل".

دا زياتوي: "دا عکسونه هېښوونکي نه دي. يوه ځوانه مېرمن ښيي چې پيتاوې ته پرته ده او ځيگر يې لوڅ دى هغسې چې په ميليونونو نورې مېرمنې خلک د سمندر پر غاړو ويني."

فرانسوۍ مجله د برتانوي شاهي کورنۍ غبرگون تر " حد ډېر" بولي.

د برتانيا د شاهي کورنيو د چارو څارونکى د بي بي سي خبريال نيکولس وېچل وايي دۀ کله پخوا د شاهي کورنۍ دومره ښکاره غصه نه ده ليدلې او دا د شهزاده ويليم د احساساتو ښکارندويي کوي.

برتانوي ورځپاڼو ته همدا عکسونه د پيسو په بدل کې وړاندې شوي وو خو هغوى يې له خپرولو لاس واخيست.

د سن ورځپاڼې چې په دې وروستيو کې يې د شهزاده هري لوڅ عکسونه خپارۀ کړي وو وويل چې دوى د دغو عکسونو د خپرولو نيت نه لري.

د شهزاده ويليم مور شهزادگۍ ډيانا په ١٩٩۷ کال کې هغه مهال مړه شوه چې موټر چلونکي يې په فرانسه کې له عکاسانو څخه د تېښتې په هيله گاډى تېز ځغلاوۀ.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .