د پاکستان جمعې ورځې مظاهرو کې ۱۹ کسان وژل شوي

د خپريدو وخت: 04:27 گرینویچ - شنبه‬ 22 سپتمبر 2012 - 01 تله 1391

راپورونه وايي چې په دغو مظاهرو کې ګڼ کسان داسې ټپیان شوي، چې د مړینې وېره یې ډېره ده.

د اسلام پر ضد د جنجالي فلم له امله د پاکستان په بېلابېلو ښارونو کې د تاوتريخوالو نه په ډکو مظاهرو کې لږ تر لږ ۱۹ تنه وژل شوي دي.

په مظاهرو کې د ژوبلو شوو کسانو د مرګ وېره هم شته.

د کراچۍ په ښار کې پوليس له هغو مظاهره کوونکو سره په نښته کېوتل چې بانکونو او سينماگانو ته يې اور ورته کاوه.

په تلويزيوني انځورونو کې ښکارېدل چې د پېښور په ښار کې اعتراض کوونکو سپکې وسلې هم کارولې.

کلېکاږل د مظاهرو عکسونه

په پلازمېنه اسلام اباد کې پوليسو د هغو زرگونه لاريون کوونکو د يرغل مخه د اوښلن غازو په شيندلو سره ونيوله، چې غوښتل يې هغې ديپلوماتيکې سيمې ته وردننه شي چې د امريکا سفارت هم په کې پروت دى.

رخصتي

په پاکستان کې د لاريون پرمهال د تاوتريخوالي رپوټونه داسې مهال ورکړل شوي چې دولت د جمعې په ورځ د سوله ييزو لاريونونو لپاره رخصتي اعلان کړې وه.

د امريکا د بهرنيو چارو وزيرې هيلري کلنټن د پاکستان له حکومته مننه وکړه چې په مظاهرو کې يې د هغه هېواد په ديپلوماتيکو سيمو د يرغل مخه نيولې وه:

''غواړم د پاکستان د حکومت له هغو زلمو مننه وکړم چې په اسلام اباد کې يې زموږ پر سفارت، په لاهور، پېښور او کراچۍ ښارونو کې يې زموږ د کونسلګريو ساتنه کړې، زه غواړم په زغرده ووايم، لکه څنگه چې مې په وار، وار ويلي تاوتريخوالي نور نه شو زغملاى، د تاوتريخوالي لپاره نوره هېڅ توجيه نه ده پاتې، خو ځينې حرکتونه شته چې موږ تريېه په هېڅ ډول ملاتړ نه شو کولاى.''

د پېښور په وژل شوو کې یو هم د پاکستاني تلوېزیون آی ار ټي ګاډی چلوونکی وو، چې ویل کېږي د پولیسو په ډزو وژل شوی.

راپورونه وايي چې په دغو مظاهرو کې ګڼ کسان داسې ټپیان شوي، چې د مړینې وېره یې ډېره ده.

په اسلام اباد کې د بي بي سي خبریال وايي، د ځینو ټپیانو او ژوبلو کسانو روغتیايي حالت د اندېښنې وړ بلل شوی دی.

د پېښور په وژل شوو کې یو هم د پاکستاني تلوېزیون آی ار ټي ګاډی چلوونکی وو، چې ویل کېږي د پولیسو په ډزو وژل شوی.

په امریکا کې د "مسلمانانو معصومیت" په نامه تر خپاره شوي فلم وروسته د نړۍ په ګڼو مسلمانو هېوادونو کې مظاهرې وشوې، چې په ځینو کې پر تاوتریخوالي هم واوښتې.

ددغو مظاهرو لړۍ ځینو اروپايي هېوادونو ته هم وغځېدله.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .