اردوغان: 'عدالت او پراختیا' ګوند اسلامي نړۍ ته نمونه دی

د خپريدو وخت: 06:11 گرینویچ - دوشنبه 01 اکتوبر 2012 - 10 تله 1391
اردوغان

اردوغان د کانفرانس ګډونوالو ته وویل "موږ ځانونه محافظه کاره دیموکراتان ګڼو. "

ترکي لومړي وزیر رجب طیب اردوغان ویلي چې په هېواد کې یې واکمن د عدالت او پراختیا ګوند په نورو مسلمانو هېوادونو کې یوه نمونه ګڼل کېږي.

نوموړي دا څرګندونې د عدالت او پراختیا ګوند په یوه کانفرانس کې کړي دي.

دغه ګوند په ترکیه کې له شاوخوا لس کاله واکمن دی.

دغه کانفرانس ته د مصر او قرغیزستان ولسمشران هم ور بلل شوي وو.

د فلسطين د اسلامي مقاومت ګوند د سیاسي دفتر مشر خالد مشعل، چې دا مهال په تبعید کې دی، کانفرانس ته وویل چې د عدالت او پراختیا ترکی ګوند "د اسلام سپېڅلې بڼه" ښکاره کړې ده.

نوموړی وايي"ښاغلی اردوغان! ته اوس په ترکیه کې نه یوازې ولسمشر یې، بلکې د اسلامي نړۍ مشري هم کوې."

د ترکیې عدالت او پراختیا ګوند له ۲۰۰۲ راپدېخوا په درو ولسمشریزو ټاکنو کې پرله پسې بریالی شو.

دغه ګوند د ترکیې اقتصادي وده پراخه او بهرنی سیاست پیاوړی کړ، چې په کې لیبرال اقتصادي او اسلامي محافظه کاره افکار راغونډي کړي دي.

"محافظه کاره دیموکراتان"

خو منتقدین اردوغان د صدام د سیاسي منهج په عملي کولو تورنوي.

اردوغان د کانفرانس ګډونوالو ته وویل "موږ ځانونه محافظه کاره دیموکراتان ګڼو. "

هغه زیاتوي چې "موږ د سیاسي حقونو او ازادیو ګټیالي یو، دغه دریځ زموږ له هېواده نورو ته هم رسېدلی او د ټولو مسلمانو هېوادونو لپاره یوه نمونه ګرځېدلې ده. "

دغه کانفرانس ته د بي بي سي ورغلی استازی جیمز رینولدز وايي چې ښاغلی اردوغان د څه باندې دوه ساعته وینا پرمهال ډېر ارامه ښکارېده، او د وینا په پیل کې یې خپل کوټ ویوست.

کانفرانس ته په شمالي عراق کې د کردستان ولایت مشر مسعود بارزاني هم ورغلی و.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .