المعلم: واشنګټن او ملاتړي یې د سوري ترهګرو ملا تړي

د خپريدو وخت: 06:28 گرینویچ - سه شنبه 02 اکتوبر 2012 - 11 تله 1391
المعلم

المعلم وویل چې سوریه لاهم د څه باندې یوه کلن تاوتریخوالي او جګړو لپاره "پر سیاسي حل باوري یم".

د سوریې د بهرنیو چارو وزیر د ملګرو ملتونو په عمومي غونډه کې پر امریکا، فرانسې، قطر، سعودي عربستان او ترکیې د سوري یاغیانو د ملاتړ تور پورې کړ.

ولیدالمعلم وویل، چې دغه هېوادونه یاغیانو ته وسلې او پیسې ورکوي او ان بهرني اورپکي هم ورلېږي.

المعلم ټینګار وکړ چې د بشارالاسد د لیرې کېدو لپاره بهرني فشارونه "د سوریې په کورنیو چارو کې بربنډه لاسوهنه ده" او دا د سوري ولس" د ځمکنۍ بشپړتیا" لپاره ګواښ دی.

دغه سوري چارواکي د ملګرو ملتونو د کلنۍ غونډې پر وروستۍ ورځ، چې ۱۹۳ غړو په کې ګډون کړی و، وویل چې "په امنیت شورا کې هغه دایمي غړي، چې د ترهګرۍ ضد مبارزه کې یې چیغه پورته کړې ده، اوس پخپله زما په هېواد کې د ترهګرو ملا تړي.

هغه وویل، چې یاد شوي هېوادونه د ملګرو ملتونو پرېکړو او تګلارې ته پام نه کوي.

وړاندې د ملګرو ملتونو عمومي منشي بان کي مون له المعلم سره وکتل او په "سختو ټکو" یې سوریه کې روانه جګړه، ویجاړي او د بشري حقونو سرغړونې وغندلې.

هغه وویل چې پر ولسي خلکو د حکومتي ځواکونو بمبارۍ هېڅ د منلو نه دي.

سوري مخالفین

ولیدالمعلم امریکا او ملاتړي یې د سوري یاغیانو په مالي ملاتړ او د وسلو په ورکولو تورن کړل.

د بان کي مون ویاند وايي چې هغه "ټینګار وکړ چې د سوریې ولس هره ورځ مري، او له سوري حکومته یې پر خپل ولس د زړه سوي غوښتنه وکړه."

دپلوماتیک حل

المعلم وویل چې سوریه لاهم د څه باندې یوه کلن تاوتریخوالي او جګړو لپاره "پر سیاسي حل باوري یم".

ده وویل: "موږ لاهم پر سیاسي حل باور لرو، چې له دې کړکېچه راووځو، او سوریه کې د ننه او بهر کې ټولو ښکېلو سیاسي ډلو او کسانو ته وایم چې د خپل هېواد په ملي کچه خبرې وکړي."

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .