پر سپینه ماڼۍ انټرنیټي برید شوی

د خپريدو وخت: 08:54 گرینویچ - سه شنبه 02 اکتوبر 2012 - 11 تله 1391
syber attack

د امریکا رسنیو د یکشنبې په ورځ وویل، چې د چین د حکومت اړوندو هیکرانو د سپینې ماڼۍ پوځي دفتر په نښه کړی دی.

سپینې ماڼۍ منلې، چې له انټرنیټي برید سره مخامخ شوې ده، خو د چارواکو په وینا داسې یوه شبکه د دغه برید ښکار شوې، چې مهم استاد په کې موجود نه وو.

په واشنګټن کې د ولسمشر اوباما د دفتر یوه اداري چارواکي امریکايي رسنیو ته ویلي، چې داسې ثبوتونه نه دي تر لاسه شوي، چې هیکرانو کوم مهم معلومات غلا کړي دي.

د امریکا رسنیو د یکشنبې په ورځ وویل، چې د چین د حکومت اړوندو هیکرانو د سپینې ماڼۍ پوځي دفتر په نښه کړی دی.

د سپینې ماڼۍ په خبره دا یوه (سپیر فشنګ) هڅه وه او تر اوسه پورې داسې ویل ګران دي، چې د دې برید ماخذ چین و او که نه.

د سپیر فشنګ په وسیله زیانمونکي ویبپاڼې او فایلونه د اټیچمینټ په توګه د اصلي برېښنا لیک پیغامونو په بڼه لېږل کیږي.

اداري چارواکي د نوم د نه افشا کولو په شرط ایسوسیټډ پریس او نورو امریکايي رسنیو ته وویل، چې دغه ډول بریدونه اکثر کیږي، خو د نوموړي په وینا دوی يي د مخنیوي لپاره له مخکې نه چمتو دي.

په امریکا کې د انټرنیټي خوندیتوب یوه لوړپوړي چارواکي سیمویل کاکس تېره اوونۍ رایټرز خبري اژانس ته ویلي و، چې د چین اړونند هیکرانو د پنټاګان په ګډون په امریکايي حکومتي ادراو بریدونه ډېر کړي دي.

د نوموړي په خبره د امریکا د دفاع وزارت په ضد دغه ډول هڅې تل دوام لري. په ۲۰۱۱ کې ګوګل په چینايي هیکرانو تور ولګاوه چې د امریکا د لوړپوړو او پوځي مقاماتو په ګډون يې د سلګونو کسانو جې میل اکاونټونه هیک کړي دي.

د همدې کال په نومبر میاشت کې د امریکا د څارګرو ادارو چارواکو له خوا لومړی ځل په ولسي کچه پر چین تور ولګېد، چې د امریکا هاي تکنالوژي ډیټا يې غلا کړې ده.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .