د بي پيلوټه الوتکو بريدونو ته د معلوماتو برابرول قانوني دي؟

د خپريدو وخت: 17:29 گرینویچ - چارشنبه 24 اکتوبر 2012 - 03 لړم 1391

درپوټونو له مخې بي پیلوټه بريدونو دپاکستان په قبايلي سيمو کې شاوخوا درې زره کسان وژلي

د برتانيا يوه لوړه محکمه د دې ارزونه کوي چې آيا د برتانوي استخباراتو له لوري د پاکستان په قبايلي سيمو کې د امريکا بي پيلوټه الوتکو بريدونو ته د استخباراتي معلوماتو برابرول قانوني دي اوکه نه؟

محکمې دغه ارزونه وروسته له هغه پيل کړه چې دنورخان په نوم هغه پاکستاني چې تيرکال يې پلار دامريکا د بي پيلوټه الوتکي په يوه بريد کې ووژل شو ، په دې اړه د پلټنې غوښتنه وکړه.

داسې ويل کېږي چې برتانوي استخبارات د پاکستان په قبايلي سيمو کې د هغو موخو د ځاى ځايگي په اړه امريکا ته معلومات برابروي چې بي پيلوټه الوتکې پرې گوازارونه کوي.

په اسلام آباد کې د نورخان مدافع وکيل اکبرشهرزاد بي بي سي ته وويل دوى د برتانيا له حکومت نه غوښتي چې په دې اړه معلومات ورکړي چې آيا چې په کوم بريد کې چې د نورخان پلار و وژل شوى هم برتانوي استخباراتو معلومات برابر کړي و؟

په همدې حال کې پاکستان کې يوې محکمې د پاکستان له پخواني پوځي مشر پرويز مشرف نه غوښتنه کړې چې په دې اړه سپيناوى وکړي چې ولي يې امريکايانو ته دا اجازه ورکړې وه چې د پاکستان په قبايلي سيمو کې د بي پيلوټه الوتکوگوزارونه وکړي.

درپوټونو له مخې دغو بريدونو دپاکستان په قبايلي سيمو کې شاوخوا درې زره کسان وژلي چې ترنيمايي ډير يې ولسي وگړي دي.

د بشري حقونو نړيوالو سازمانونو د بي پيلوټه الوتکو بريدونه د جگړې د قوانيو مخالف بللي دي ، خو امريکا يې د ترهگرو په ځپلو کې خپله تر ټولو اغيزمنه وسيله بولي.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .