اوباما واشنګټن ته ستون شو

د خپريدو وخت: 05:48 گرینویچ - پنجشنبه 08 نومبر 2012 - 18 لړم 1391

بارک اوباما د امریکا یو له هغو په ګوتو شمېر ولسمشرانو دی، چې د بې کارۍ د کچې د لوړېدا سربېره، ددویم ځل لپاره سپینې ماڼۍ ته لاره مومي.

د امریکا متحدو ایالتونو ولسمشر بارک اوباما په شیکاګو ښار کې خپلو پلویانو ته د وینا پرمهال وویل چې د امریکا لپاره "غوره راتلونکی" راروان دی.

نوموړی د دویم ځل لپاره د امریکا د ولسمشر په توګه واشنګټن ښار ته له خپلې کورنۍ سره ستون شوی دی.

د هغه د ټاکنیزو ډېرې هڅې له شیکاګو ښار څخه سمبالېدې.

بارک اوباما داسې مهال واشنګټن ته ستون شوی، چې امریکايي سیاسي څارونکي په دې اند دي، چې اوباما به د دویم پړاو ولسمشرۍ پرمهال له ډېرو ننګونو سره مخامخ شي.

تر ټولو لویې ننګونې، د امریکا پور، د مالیو ډېرول او د لګښتونو کمول په ګوته شوي دي.

جمهوریت غوښتونکي غواړي چې یوځل بیا د خپل ګوند د اکثریت په بریالي کېدو سره په کانګرس کې خپل استازیتوب وساتي.

د امریکا مشرانو جرګه هم د دیموکراتانو په کنټرول کې پاتې ده.

د امریکا د مشرانو او ولسي جرګو غړي په تېر کې له یو بل سره ګڼې اختلافات لرل، چې اصلي دلیل د بارک اوباما د لومړۍ دورې پرمهال سیاسي مخالفتونه ښيي.

خو واشنګټن ته د اوباما له ستنېدا وړاندې، د ولسي جرګې ویاند، چې د جمهوریت غوښتونکو له ډلې دی، ویلي چې دواړه ګوندونه به په راتلونکي کې د ستونزو په حل کې سره یو موټی شي.

هغه وویل، که چېرې دغه موضوع ثابته شي، ښاغلی اوباما به هم له جمهوریت غوښتونکو سره د مالي بدلونونو په سیستم کې د بدلون راوستلو په چاره کې همکاري وکړي.

بارک اوباما د امریکا یو له هغو په ګوتو شمېر ولسمشرانو دی، چې د بې کارۍ د کچې د لوړېدا سربېره، ددویم ځل لپاره سپینې ماڼۍ ته لاره مومي.

لومړنۍ شمېرې ښيي، چې د سږکال په ولسمشریزو ټاکنو کې د امریکایانو د ګډون کچه د څلورو کالو مخکې ګډون پرتله ټیټه وه.

سږ کال نژدې ۱۱۷ میلیون امریکایانو په ټاکنو کې ګډون کړی و.

دغه شمېره څلور کاله مخکې د ولسمشریزو ټاکنو پرمهال ۱۳۱ میلیون ته رسېدلې وه.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .