سوري مخالفینو د "مرج السلطان" پوځي اډې نیولو ادعا کړې

د خپريدو وخت: 05:41 گرینویچ - دوشنبه 26 نومبر 2012 - 06 لیندۍ 1391

یوه فعال ویلي چې د اډې پرسر په جګړه کې ۱۵ یاغیان او اته پوځیان وژل شوي دي.

په سوریه کې یاغیان وايي له پلازمېنې دمشق سره نژدې یې د څرخي الوتکو د ګڼو اډو کنټرول خپل کړی دی.

پر یو ټویپ خپرې شوې ویډیوګانې ښيي چې یو مخالف وسله وال له یوې ویجاړې شوې څرخي الوتکې سره خوا کې ولاړ دی او نور یاغیان د مرج السلطان اډې ته ننوځي.

دا ویډیوګانې په خپلواکه توګه نه دي تایید شوي.

خو په وروستیو اوونیو کې یاغیانو د حکومت د هوايي ځواک چې د یاغیانو پرضد په جګړه کې د حکومت مهم تکتیک دی د کمزوري کولو په موخه یو شمېر هوايي اډې نیولې دي.

په یوې خپرې شوې ویډیو کې ښودل کېږي چې یاغیان پر مرج السلطان هوايي اډې ډزې کوي.

یوه فعال ویلي چې د اډې پرسر په جګړه کې ۱۵ یاغیان او اته پوځیان وژل شوي دي.

دغه راز په دمشق او شاوخوا سیمو کې هم نښتې شوې، چې په پایله کې یې ۵۰ کسان وژل شوي دي.

ناتایید شوي راپورونه وايي دولتي ځواکونو له دمشق سره نژدې ګڼې سیمې په نښه کړې.

ملګري ملتونه اټکل کوي چې په سوریه کې د پاڅون له پیل راهیسې ۲۰ زره کسان وژل شوي دي خو فعالان دا شمېره ډېره بولي او وايي د ۲۰۱۱ میلادي کال د مارچ په میاشت کې د ولسمشر بشارالاسد د رژیم پرضد د پیل شوي پاڅون له پیل راهیسې ۴۰ زره کسان وژل شوي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .