کشمیر کې واورې ښویېدو ۱۱کسان وژلي

د خپريدو وخت: 05:47 گرینویچ - شنبه‬ 01 ډسمبر 2012 - 11 لیندۍ 1391

کشمیر کې واورې ښویېدو پاکستاني پوځيان لاندې کړي

د پاکستان تر ولکې لاندې کشمیر کې واورې ښویېدو لږترلږه ۱۱ کسان وژلي چې پوځيان او ولسي خلک په کې دي او د اتو پوځيانو په ګډون ۱۸ نور کسان تری تم شوي.

چارواکو ویلي، چې واورې ښویېدنه د نیلم درې په غرنۍ سیمه کې رامنځ ته شوې ده.

پوځيان د واورې په ښویېدو کې د خپلو ورکو ملګرو په لټه کې وو، چې ددویم ځل لپاره واورې لاندې کړل.

پاکستاني چارواکو ویلي، چې د ورکو شویو پوځيانو لټون او د ژغورنې چارې د بدې هوا له کبله له خنډ سره مخامخ شوي.

ژغورندویه ډلې ددو کسانو مړي موندلي.

په تېره جمعه، د کنټرول پر کرښه د پاکستان لوري ته واوره وښویېده، چې ددې سیمې پر سر پاکستان او هند له یو بل سره اوږده شخړه لري.

هند او پاکستان د هیمالیا سیمې پر سر له یو بل سره دوه ځلې جګړې کړي دي، چې دواړه یې د ملکیت ادعاوې کوي.

دواړو هېوادونو په شخړمنه سیمه کې زرګونه پوځيان ځای پرځای کړي.

په دغه سیمه کې په ۲۰۰۳ کال اوربند اعلان شو.

چارواکو ویلي، چې ډېرې واورې د واورو ښویېدو لامل شوې، چې معمولاً په دغه سیمه کې کېږي.

په تېر اپریل کې، لږترلږه ۱۴۰ پاکستاني پوځيان هغه مهال تر واورې ښویېدو لاندې شول، چې د واورو یوه لویه څپه په لیرې سیاچین غرنۍ سیمه کې پرې راوښویېده.

ټول پوځيان ترې لاندې او ووژل شول، چې لاهم د ځینو پوځيانو مړي تر اوسه نه دي رایستل شوي.

او په تېره فبرورۍ کې، لږترلږه ۱۶ هندي پوځيان د دندې پرمهال د کشمیر په یوه غرنۍ سیمه کې هغه مهال ووژل شول، چې د واورې ښویېدو له کبله یې د ددو وژل شوو پوځيان لټون کاوه.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .