بان کي مون: سوریه کې بې رحمي اوج ته رسېدلې

د خپريدو وخت: 09:30 گرینویچ - شنبه‬ 01 ډسمبر 2012 - 11 لیندۍ 1391

ښاغلي مون وړاندویېنه وکړه، چې له پراخیدونکي زور زیاتي سره به د ژمي پر مهال نژدې ۴۰ لکه کسان مرستو ته اړ شي.

د ملګرو ملتونو عمومي منشي بان کي مون ویلي، چې په سوریه کې د تشدد روانه لړۍ اوس د بې رحمۍ اوج ته رسېدلې.

نوموړی دغه څرګندونې داسې مهال وکړې، چې د سوریې حکومتي پوځ د دغه هېواد د حکومت له مخالفانو سره د پلازمېنې دمشق په څنډو کې په جګړه بوخت دی او د ښار مرکزي هوايي ډګر د الوتکو د تګ راتګ پر مخ تړل شوی دی.

د ملګرږ ملتونو عمومي غونډې ته په وینا کې ښاغلي مون وویل، چې سوریه کې عام وژنه دوام لري او ډېر خلک کډوالۍ ته اړ شوي دي.

نوموړي زیاته کړه، د راتلونکي کال د پیل تر مهاله به د سوري کډوالو شمېر نژدې اووه سوه زره کسانو ته ورسیږي.

ښاغلي مون وړاندویېنه وکړه، چې له پراخیدونکي زور زیاتي سره به د ژمي پر مهال نژدې ۴۰ لکه کسان مرستو ته اړ شي.

هغه زیاته کړه، چې د یوه خپلواک او ولسواک هېواد په توګه سوریه کې سیاسي خبرو اترو ته اړتیا ده.

په ورته مهال د سوریې لپاره د عرب لیګ او ملګرو ملتو استازي اخضر ابراهیمي ویلي، که د سوریې بحران ته د حل لار ونه موندل شي، سوریه به یو نابریالي هېواد شي.

"د امریکا د متحده ایالاتو د بهرنیو چارو وزارت ویاندې وکټوریا نولانډ ویلي، چې په سوریه کې د انټرنیټ او موبایل شبکو د بندیدو پړه د سوریې د حکومت پر غاړه ده."

په سوریه کې د حکومت مخالف فعالان وايي د جمعې په ورځ په دغه هېواد کې د نښتو له کبله له ۸۰ ډېر کسان وژل شوي دي.

د دوی په خبره د جمعې په ورځ د پلازمېنې دمشق په شاوخوا کې د حکومتي ځواکونو او مخالفانو تر منځ یې سختې نښتې وشوې، چې له کبله یې یو شمېر الوتنې لغوه شوې.

بل لور ته په سوریه دریمه ورځ هم د انټرنیټ او ګرځنده ټیلیفون شبکې غیر فعاله وې.

د امریکا د متحده ایالاتو د بهرنیو چارو وزارت ویاندې وکټوریا نولانډ ویلي، چې سوریه کې د انټرنیټ او موبایل شبکو د بندېدو پړه د دغه هېواد د حکومت پر غاړه ده.

د نوموړې په خبره دغه اقدام د بشارالاسد حکومت مایوسي څرګندوي.

په ترکیه کې د بي بي سي خبریال په خپل رپوټ کې ویلي، چې له سختې جګړې وروسته د سوریې حکومتي ځواکونه توانیدلي، چې د ښار مرکزي هوايي ډاګر خلاص کړي.

سوریه کې د بشري حقونو فعالان وايي د تېر کال په مارچ میاشت کې د بشارالاسد د حکومت پر ضد له پیل شوي احتجاج راهیسې په دغه هېواد کې نژدې ۴۰ زره کسان وژل شوي دي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .