رحمان ملک: "باثباته افغانستان د پاکستان د امنیت ضمانت دی"

د خپريدو وخت: 12:02 گرینویچ - دوشنبه 17 ډسمبر 2012 - 27 لیندۍ 1391

د پاکستان د کورنیو چارو وزیر له بي بي سي سره په مرکه کې وویل د افغانستان د سولې له بهیر سره د مرستې په خاطر مو څو تنه طالبان خوشي کړل

با ثباته افغانستان په پاکستان کې د امنیت ضمانت دی ځکه نو موږ تل د افغانستان د سولې له بهیر سره مرسته کړې او په وروستیو کې مو هم څو تنه طالبان خوشي کړل.

دغه خبره د پاکستان د کورنیو چارو وزیر رحمان ملک په ډیلي کې د بي بي سي له هندي څانګې سره په خبرو کې وکړه.

ښاغلي ملک وویل نړۍ باید پوهه شي چې پاکستان د هغې جګړې ښکار دی چې له شمالي او سویلي وزیرستان نه پیل شوې ده.

د هغه په ژبه داسي ورځ به نه وي چې د استخباراتي معلوماتو پر بنسټ د پاکستان حکومت د ترهګرۍ پرضد اقدام ونه کړي.

د پاکستان د کورنیو چارو وزیر رحمان ملک وویل له لویدیځ سره د پاکستان ملګرتیا پاکستان ته نه یوازې ګرانه پروتې بلکې په یوې ستونزې بدله شوې.

د ښاغلي ملک په وینا همدا اوس هم په پاکستان کې د بیلا بیلو هیوادونو بهرني اورپکي شته او په ګډه د پاکستان پرضد جنګېږي.

د پاکستان د کورنیو چارو وزیر رحمان ملک چې هندوستان ته یې د خپل درې ورځني کم ساري سفر په پائ کې له بي بي سي سره خبرې کولې وویل له موږ سره اوس هم یو شمېر افغانان د ویزو د نه لرلو او ځینو نورو جرمونو له امله په بند کې دي خو موږ هرکله دغه ډول بندیان په خوشحالۍ خوشي کړي او نور به هم خوشي کړو.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .