بنګله دېش کې سیاسي مشر په جنګي جرم محکوم شو

د خپريدو وخت: 08:05 گرینویچ - سه شنبه 05 فبروري 2013 - 17 سلواغه 1391

د جماعت اسلامي ګوند غړی عبدلقادر ملا د یادې محکمې لخوا په عمري بند محکوم شو.

بنګله دېش کې د جنګي جرمونو یوې ځانګړې محکمې د دغه هېواد د مهم اسلامپالي ګوند یو مشر په ۱۹۷۱ کال کې له پاکستانه د خپلواکۍ اخېستلو د جګړې پر مهال د وژنې په ګډون یو شمېر قضیو کې مجرم بللی دی.

د جماعت اسلامي ګوند غړی عبدلقادر ملا د یادې محکمې لخوا په عمري بند محکوم شو.

د اټکل له مخې په یاده مبارزه کې کابو درې میلیونه بنګله دېشیان وژل شوي وو. دولس کسان، چې ډېر یې د جماعت اسلامي غړي دي، محکمې ته ورپېژندل شوي دي. په دوی کې یو تن وار له مخه د مرګ په سزا محکوم شوی دی.

دغه ځانګړې محکمه د هغو کسانو د محاکمه کولو لپاره جوړه شوې، چې په ۱۹۷۱ کال کې له پاکستاني ځواکونو سره په همکارۍ تورن شوي دي. خو مخالفین حکومت په سیاسي دښمنۍ تورنوي.

دغې محکمې تر اوسه د جماعت اسلامي ګوند د یو شمېر مشرانو په ګډون ځینې کسان د دې تورونو له امله بندیان کړي، خو نیول شوي کسان دغه تورونه ردوي.

"جماعت اسلامي په ۱۹۷۱ کې د بنګلادېش د خپلواکۍ تحریک مخالفت کړی و او پرې د پاکستاني پوځ په ادعا شویو جرمونو کې د ګډون تورونه لګېدلي."

جماعت اسلامي په ۱۹۷۱ کې د بنګلادېش د خپلواکۍ تحریک مخالفت کړی و او پرې د پاکستاني پوځ په ادعا شویو جرمونو کې د ګډون تورونه لګېدلي.

د ۱۹۷۱ کال په دسمبر کې بنګله دېش له پاکستانه بیل شو او د یوه خپلواک هېواد په توګه یې د نړۍ په نقشه کې ځای وموند.

په هغه جګړه کې، چې د ۱۹۷۱ په لومړیو کې پیل شوه او تر ۹ میاشتو یې دوام وکړ د یو شمېر بنګله دېشې فعالانو په وینا درې سوه زره کسان ووژل شول.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .