"سوري حکومت او مخالفان یې باید له فرصته ګټه واخلي"

د خپريدو وخت: 05:33 گرینویچ - شنبه‬ 02 مارچ 2013 - 12 کب 1391

د سوريې پرجګړې اوس دوه کلونه تېرېږي، م م اټکل کوي چې په دغه جګړه کې لږترلږه ۷۰ زره کسان وژل شوي.

د ملګرو ملتونو سرمنشي بان کي مون د سوريې حکومت او مخالفې ډلې هڅولې چې سره ناسته کې له هغه څه ګټه واخلي چې ده د فرصت يوه وړه کړکۍ وبلله.

ښاغلي بان دغه څرګندونې د سوريې لپاره ځانګړي استازي لاخضر ابراهيمي سره له شخصي خبرو مخکې په جينيوا کې د م م مرکز کې کولې.

د سوريې پرجګړې اوس دوه کلونه تېرېږي، م م اټکل کوي چې په دغه جګړه کې لږترلږه ۷۰ زره کسان وژل شوي او نژدې يو میليون کډوالۍ ته اړ شوي دي.

له جينيوا نه د بي بي سي خبرياله ايموجين فولکس خپل راپور کې وايي:

د ملګرو ملتونو سرمنشي څرګندونې داسې ښکاري د هغو تازه اشارو پخلی کوي چې د سوريې مخالفې ډلې او د حکومت غړي، يا لږ ترلږه ځينې کېدای شي مخامخ خبرو لپاره چمتو وي. بان کي مون دا د فرصت يوه وړه کړکۍ وبلله، چې ده ترې د ګټې اخيستو لپاره دواړه خواوې په ټینګار وهڅولې. نوموړي خبرداری ورکړ چې کېدی شي دغه کړکۍ ډېر ژر وتړله شي.

"د داسې پراخو خبرو د شونتيا په اړه د پوښتنې په ځواب کې چې د ملګرو ملتونو امنيت شورا غړي په کې شامل وي، ښاغلي بان وويل داسې څه پلانونه نه شته."

د داسې پراخو خبرو د شونتيا په اړه پوښتنې په ځواب کې چې د ملګرو ملتونو امنيت شورا غړي په کې شامل وي، ښاغلي بان وويل داسې څه پلانونه نه شته او زياته يې کړه ملګري ملتونه د غورواوي ډېرې کمې لارې لري، پرته له دې چې د بشري مرستو بهير روان وساتي:

"د هېواد دننه د سياسي خبرو يا سياسي حل نشتوالي کې، څه چې موږ يې بايد اوسمهال وکړو، د خپلې بشري مرستې زياتوالی دی. په يوازې يوه مياشت، فبرورۍ کې موږ ۱۵۰ زره کډوال وليدل. د تښتېدونکو خلکو شمېر چې په چټک ډول زياتېږي، زموږ سره له شته وسايلو او سرچينو اوښتی دی."

د ملګرو ملتونو سرمنشي وويل سوريه کې د پرله پسې ناورين په اړه خواشينی دی. ټاکل شوي ښاغلی بان نن شنبه/خالي (د مارچ ۲) په جينوا کې د سوريې لپاره ځانګړي استازي لاخضر ابراهيمي سره خبرې وکړي. دغه خبرې به د تړلو دروازو تر شا وي، خو ښاغلي بان وويل تمه لري چې ډېرې ژورې خبرې به وي.

په دې اړه نور مطالب

تړلي موضوعات

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .