"د طاهر اشرفي څرګندونې د پاکستان رسمي نظر نه دی"

د خپريدو وخت: 07:06 گرینویچ - سه شنبه 05 مارچ 2013 - 15 کب 1391

د طاهراشرفي څرګندونې په افغانستان کې په کلکه وغندلې شوې.

د پاکستان د بهرنیو چارو وزارت ویلي چې د دغه هېواد د عالمانو د شورا مشر علامه طاهراشرفي هغه څرګندونې، چې افغانستان کې یې د ځان وژونکو بریدونو په اړه کړې، د پاکستاني حکومت نظر نه دی.

د پاکستان د بهرنیو چارو وزارت بیانیه د افغان ولمشر حامد کرزي له هغو څرګندونو ورسته خپره شوه چې په کې نوموړي ویلي، طاهراشرفي د پاکستاني حکومت لخوا افغان پلاوي سره د خبرو لپاره ټاکل شوی و او د هغه بیان ښیي چې 'ګاونډی هېواد د ترهګرۍ ضد جګړه کې مخلص نه دی'.

افغانستان کې د دواړوهېوادونو د دیني عالمانو دې میاشت کې د کېدونکي کنفرانس له بایکاټ ورسته طاهراشرفي یوه شخصي افغان ټیلويزيون سره په مرکه کې ویلي و چې ' کشمیر د هند ، فلسطین د اسراییلو او افغانستان د امریکایانو لخوا اشغال شوي دي او که چېرې مسلمانانو سره اټومي بم نه وي، نو هغوی باید د الله لپاره ځانونه قربان کړي.'

د طاهراشرفي څرګندونې په افغانستان کې په کلکه وغندلې شوې، خو د ښاغلي کرزي له څرګندونو ورسته پاکستان هم رسمي غبرګون څرګند کړ.

د پاکستان د بهرنیو چارو وزارت ویلي چې 'د خلکو شخصي بیانونه هېڅکله هم د پاکستان د حکومت دریځ نه څرګندوي.

د پاکستان د بهرنیو چارو وزارت ویاند ویلي 'پاکستان کې دیني عالمانو بیا بیا ځان وژونکي بریدونه غندلي او دغه عمل یې د مذهب پر ضدبللی'.

ویاند دا هم ویلي، چې طاهر اشرفي ده ته منسوبې شوې څرګندونې رد کړې. بل لور ته طاهر اشرفي بي بي سي ته ویلي چې شخصي تیلويزيون د ده په وینا 'مرکه کې خیانت کړی او ډېره برخه یې نه ده خپره.'

د پاکستان او افغانستان ترمنځ نوې لانجه د دواړو هېوادونو د عالمانو د کنفرانس پر سر راپورته شوې چې پاکستاني عالمانو یې په دې ادعا بایکاټ اعلان کړ، چې کیداې شي د طالبانو پر ضد په کې فتوی جاري شي، چې افغان عالمانو دا خبره سمه نه ده بللې.

په دې اړه نور مطالب

BBC © 2014 .بي بي سي د پرديو ويبپاڼو د مطالبو مسووليت نه اخلي

.دا پاڼه که د سټايل شيټ براوزر لرونکې ويبپاڼې له خوا ( سي ايس ايس ) وليدل شي ښه به ښکاره شي. که څه هم په اوسني بروزر کې هم دا پاڼه تاسو ليدلى شئ خو تاسو به پوره تصوير پکې نه وينئ . لطفآ د خپل براوزر پر نوي کولو فکر وکړئ او يا که يې کولى شئ د سټايل شي برخه له کاره وغورځوئ .