کابل له پاکستانه د پېښور د برید توضیحات غواړي

Image caption په برید کې لږترلږه لس کسان ووژل شول.

افغان حکومت له پاکستانه غوښتي، چې د خیبر پښتونخو پېښور د تېرې دوشنبې ورځې د برید په اړه پلټنې ورسره شریکې کړي.

په دغه برید، چې د تېرې دوشنبې په ورځ (اپریل ۲۹) د افغان کونسلګرۍ د دوو مامورینو په ګډون لس کسان په کې ووژل شول.

پېښور کې افغان کونسل سید محمد ابراهیم خېل وویل، چاودنه کې د افغان کونسلګرۍ دوه کارکوونکي قاري هلال احمد وقاد او حاجي ادریس وژل شوي دي.

نوموړی وايي، چې مړي یې افغانستان ته ولېږدول شول.

قاري هلال احمد د افغانستان د سولې د عالي شورا د یوه غړي قاضي محمد امین وقاد زوی و.

تر اوسه د دغه برید پړه کومې ډلې پرغاړه نه ده اخیستې.

پېښور کې د پولیسو یوه افسر ویلي، چې د برید هدف د پولسو یو ګاډی و، چې برید کوونکي غوښتل، خپل موټر سایکل یې پر ګاډي ور وجنګوي.

د برید په سیمه کې د ولي وګړو د لېږد رالېږد بسونه وو، چې زیاتره ولسي وګړي په کې ووژل شول.

په اسلام اباد کې د افغان سفارت ویاند شمس زردشت ویلي، دا لا څرګنده نه ده چې د برید هدف پېښور کې د افغان کونسلګرۍ هغه کار کوونکي وو، چې پېښور ټاون سیمه کې خپل دفتر ته روان وو او که بل څوک.

زردشت بي بي سي ته وویل، له پاکستاني حکومته یې د دغه برید د پلټنې او معلوماتو شریکولو غوښتنه کړې ده.

هغه وویل، په برید کې د افغان کونسلګرۍ دوه کارکوونکي وژل شوي.

دی وايي، چې په وژل شویو کارکوونکو د ديپلومات حیثیت نه درلود، خو قاري هلال احمد وقاد د افغان حکومت د سوداګرۍ وزارت له خوا هلته په دنده ګومارل شوی و.

ورته مطالب