د نوبل جایزې ګټونکی ایرلنډی شاعر ومړ

 شیموس هیني
Image caption په ۱۹۹۵ کال شیموس ته د هغه د ادبیاتو د خواریو او هاند له برکته د نول جایزه ورکړل شوه.

د ایرلنډ رسنیو د جمعې په ورځ د ۱۹۹۵ کال د ادبیاتو د نوبل جایزې ګټونکي ایرلنډي شاعر شیموس هیني د مړینې خبر خپور کړ.

نوموړی په څلور اویا کلنۍ کې له دې نړۍ وکوچېد.

د هغه کورنۍ د ده مړینه تایید کړې ده.

د هیني روغتیايي وضعیت په وروستیو کې مخ پر ځوړ و.

شمالي ایرلنډ کې زیږېدلی شیمس هیني د ایرلنډ پلازمېنې دبلن یوه روغتون کې ساه ورکړې ده.

هیني په ۱۹۳۹ کال د شمالي ایرلنډ تومبریدج کلي کې زیږېدلی، چې بیا وروسته بیلاګي کلي ته ماشومتوب کې لېږدېدلی.

هغه تر شعر ویلو مخکې یو ښوونکی و، خو ټیک اتلس کاله مخکې یې د ادبیاتو د نوبل جایزه وګټله.

نوموړي ته بیا وروسته نورې ډېرې جایزې هم ورکړل شوې.

هیني ۱۲ شعري ټولګې رایستلې دي، چې لومړۍ هغه یې د ۱۹۶۶ کال "د طبیعت نړۍ مړینه" او "شاقول" په نومونو ټولګې دي.

په ۱۹۹۵ کال شیموس ته د هغه د ادبیاتو د خواریو او هاند له برکته د نول جایزه ورکړل شوه.

نوموړی د انګلیسي ژبې له وتلو شاعرانو هم دی، چې د ۱۸۹۸ او ۱۹۹۴ کلونو ترمنځ یې اکسفورډ پوهنتون کې د ادب د استاد په توګه تدریس کړی.

شیموس درې اولاده لري.

ورته مطالب