مالي کې د سرتېرو او ياغيانو ترمنځ نښته روانه ده

مالي سرتېري
Image caption په دغه نښته کې تر اوسه د تلفاتو په اړه معلومات نه شته دي

د مالي په کيډال کې د حکومتي ځواکونو او مشکوکو بيلتونپالو ترمنځ جګړه روانه ده، او وېره ده چې ښايي زور واخلي.

وسله والو په ښار کې پر هغو سرتېرو بريد کړی چې د يوه بانک ساتنه يې کوله او هغوی هم ځوابي ډزې کړې دي.

ځايي خلک او يوه چارواکي چې نه غواړي نوم يې واخيستل شي ويلي، وسله وال د طواريق ډلې ياغيان دي، چې څو ورځې وړاندې يې د سولې له خبرو د وتلو اعلان کړی دی.

د فرانسې ځواکونه د مالي په شمال کې دېره شوي دي او د مالي ځواکونه کيډال ته ورستانه شوي دي.

په کيډال کې ځايي والي د فرانسې خبرې اژانس ته ويلي چې په ښار کې ډېرې ډزې شوي، وسله وال ډزې کوي او د مالي سرتيري پر ځوابي ډزې کوي.

دی وايي نه پوهېږي، چې وسله وال څوک دي، خو د ده په دفتر کې يوه کس د نوم نه ښودلو په شرط او ځايي خلکو ويلي، بريدګر هغه کسان دي چې په سيمه کې پوځ نه غواړي.

په دغه نښته کې تر اوسه د تلفاتو په اړه معلومات نه شته دي.

د شنبې د ورځې تاوتريخوالی د وروستيو نښتو وروستۍ هغه دی.

د جمعې په ورځ د مالي دوه سرتېري هغه مهال په کيډال کې ټپيان شول چې وسله والو د دوی پر لوري يو لاسي بم ګوزار کړ.

د شنبې په ورځ هغه مهال چې ځانمرګو بريدګرو يو موټر له يوه پوځي کمپ سره والوځاوه په ټيمبکټو کې لږترلږه دوه کسه ووژل شول.

د يکشنبې په ورځ يوه ځايي مشر اسوشيېټېډ پرس خبري اژانس ته وويل، چې له کيډال سره نژدې يې په کمپ کې د ډزو غږونه اورېدلي، خو په دې اړه نور جزييات نه دي ډاکيزه شوي.

د جون مياشتې تړون د ټاکنو ترسره کېدو ته فرصت ورکړ او نوي ولسمشر ابراهيم بوبکر کيتا د دې مياشتې په لومړيو کې لوړه وکړه.

هغه ژمنه وکړه چې د طواريق له پاڅون وروسته به مالي يو موټی کوي.

ورته مطالب