پاکستاني طالبان د نوي مشر پر ټاکلو غور کوي

په دې وسیله کې د غږ اوريدل او ویډیو لیدنه شونې نه ده.

په داسې حال کې چې پاکستاني طالبانو مشر حکیم الله مسعود له وژل کېدا ایله یوه ورځ تېره شوې، پاکستاني طالبانو یې د ځای ناستي ټاکلو لپاره غونډه پیل کړې ده.

حکیم الله مسعود د تېرې جمعې په ورځ د شمالي وزیرستان په ډانډي درپه خېل سیمه کې د امریکا د ډرون په برید کې ووژل شو.

له ده سره د هغه پنځه نور ملګري هم ووژل شول.

نوموړی تېره شپه ناوخته خاورو ته وسپارل شو.

د طالبانومرکزي شورا اوس د نوي مشر لپاره مشورې پیل کړې چې د طالبانو سرچینې وایي لږترلږه څلور مشران پياوړي کاندیدان دې.

په احتمالې کاندیدانو کې د قوي کاندید د تحریک طالبان پاکستان د جنوبي وزیرستان سیمې د طالبانو مشر مشر خان سید دی چې مستعار نوم یې سجنا دی .

سربېره پر سجنا، په نورو احتمالي کاندیدانو کې د سوات د طالبانو مشر مولوي فضل الله او د مومندو د طالبانو مشر عمر خالد خراساني شامل دي.

د څوکۍ لېوال

د طالبانو د اورکزيو قبایلي سیمې مشر حافظ سعید هم د یو کاندید په توګه اوس مخې ته راغلی دی.

په ۲۰۰۷ کال کې د پاکستاني طالبانو د تحریک له پیلېدو ورسته په دودیز ډول د طالبانو د تحریک مشري مسیدو (مسعودو) کړې ده.

ځینې څېړونکي وایي د نوي طالب مشر ټاکل به د پاکستاني طالبانو لپاره یو ګران کار وي؛ ځکه چې د نورو سیمو طالبان هم د دې څوکۍ نیولوته لېواله ښکاري.

ځينې پاکستاني رسنۍ وایي چې د سوات په ګډون د ملاکنډ، باجوړ او مومندو طالبان د نوي مشر په مساله یوه خوله نه دي.

کله چې د پاکستاني طالبانو د تحریک بنسټګر بیت الله مسعود په ۲۰۰۹ کال کې د امریکا د څارګرو الوتکو په برید کې ووژلی شو، نو هغه وخت د طالبانو مرستیال مولوي فقیرمحمد ځان د مشر په حیث اعلان کړ، خو وروسته د طالبانو مرکزي شورا حکیم الله مسعود نوی مشر وټاکل شو.

Image caption د حکیم الله وژنې د حکومت او طالبانو ترمنځ احتمالي خبرو ته لوی زیان رسولی دی او وزیرستان ته د یوه حکومتي پلاوي سفر لغوه شوی دی.

مولوې فقیر، چې د روان کال فبرورۍ کې افغانستان کې ونیول شو، وروسته د مرستیال په حیث لیرې کړای شو.

د طالبانو د مشر تر وژنې وروسته پاکستان کې امنیت ټینګ شوی، چې په تېر کې طالبانو د خپلو مشرانو د مرګ غچ اخیستو لپاره لوی بریدونه کړي دي.

د ترګوتوشوو معلوماتو ترمخه وزیرستان سره نژدې د ډیره اسماعیل خان په ښار کې په پوستو پوځ هم ځای پر ځای کړل شوی.

خلکو ته ویل شوي چې له شناختي کارډ پرته له خپلو کورونو بهر راونه وځي.

د حکیم الله وژنې د حکومت او طالبانو ترمنځ احتمالي خبرو ته لوی زیان رسولی دی او وزیرستان ته د یوه حکومتي پلاوي سفر لغوه شوی دی.

ټاکلې شوې وه د شنبې په ورځ له طالبانو سره د سولې د لومړیو خبرو لپاره یو پلاوی سیمې ته ورشي.

د کورنوچارو وزیر چوهدري نثار علي خان د امریکا تازه برید د سولې خبرې سبوتاژ کولو یوه هڅه بللې ده.

ورته مطالب