''د اوکراين او روسيې ترمنځ 'تاريخي' معامله شوې''

Image caption په اوکراين کې له تېرو ورځو راهيسې د اروپايي ټولنې په ملاتړ پراخې مظاهرې روانې دي

د اوکراين لومړی وزير مايکولا ازروف ويلي، چې هېواد يې له روسيې سره يوې تاريخي موافقې ته رسېدلې دی.

دی وايي دغه معامله به د اوکراين د اقتصاد په بېرته رغولو او غوړولو کې مرسته وکړي.

د روسيې ولسمشر ولادمير پوتين په دې موافقه کړې، چې د يوکراين ۱۵ ميليارده ډالر پور به روسيه پرې کړي.

په موافقه کې دغه راز ژمنه شوې، چې روسيه به اوکراين د کازو بيه هم کموي.

ښاغلي ازروف د کابينې په غونډه کې وويل، چې دغه ژمنې به د اوکراين د مالي ثبات په خوندي کولو کې مرسته وکړي.

د اوکران مخالفو مشرانو په مسکو کې د ولسمشر یانکویچ او د هغه د روسي سیال ولادمیر پوتین ترمنځ تړون غندلی او غوښتنه کړې بايد پوه شي، د دغو ژمنو او مرستو په مقابل کې روسيه څه غواړي.

د مخالفینو مشر ویتالي کلتیچکو په کیف کې اروپايي پلوه لاریون کوونکو ته وویل ښاغلی یانکویچ د هېواد له خپلواکۍ سره خیانت کوي.

سپینې ماڼۍ ویلي د روسیې او اوکراین ترمنځ تړون کې د لاریون کوونکو اندېښنو ته پام نه دی شوی.

تر دې وړاندې اوکراين له اروپايي ټولنې سره يو ځای کېدل رد کړي و، چې دې د اوکراين د خلکو غوصه راوپاروله او په مظاهرو يې لاس پورې کړ.

له تېرو څو ورځو راهيسې په پلازمېنه کيف کې له اروپايي ټولنې سره د ملاتړ په موخه مظاهرې روانې دي.

ورته مطالب