ځانګړې محکمه: پروېز مشرف د زړه ناروغي نه لري

Image caption مشرف د جنورۍ پر دويمه د زړه د درد له امله د محکمې پر ځای روغتون ته ولېږدول شو

د پاکستان د پخواني پوځي ولسمشر پروېز مشرف د خيانت تور د څېړلو په تړاو جوړه شوې ځانګړې محکمه وايي، چې نوموړی به د جنورۍ پر ۱۶مه محکمې ته حاضرېږي.

ځانګړې محکمې دغه پريکړه وروسته له هغه وکړه، چې د جنرال مشرف طبی راپور محکمې ته د ارزونې لپاره وړاندې شو.

د محکمې پرېکړه عبدالغني سومرو ولوسته، چې په هغه کې ويل شوي له راپور نه داسې برېښې چې پروېز مشرف د زړه ناروغي نه لري.

د محکمې په حکم کې ويل شوي، پخوانی ولسمشر بايد د جنورۍ پر ۱۶مه محکمې ته ورشي، که نه پر وړاندې به يې قانوني ګامونه پورته شي.

د پنجشنبې پر ورځ د ښاغلي مشرف مدافع وکیل شريف الدين پيرزاده استدلال کاوه، چې د ناروغۍ پر مهال محکمې ته د يوه تورن غوښتل له زورزياتي سره ورته دي.

د دې په ځواب کې څارنوال اکرم شيخ وويل چې په طبی راپور کې دا نه دي ويل شوي، چې پروېز مشرف دې محکمې ته نه حاضريږي.

د ښاغلي مشرف مدافع وکیل شريف الدين پيرزاده وویل، موکل يې د زړه په ناروغۍ اخته دی او په طبي راپور کې ډاکټرانو ورته د عملياتو خبره هم کړې وه.

د محکمې ځنډېدو غوښته

ده وويل چې د پاکستان د ځمکني پوځ پخوانی مشر اصف نواز جنجوعه هم د زړه د درېدو له امله مړ شوی و.

ښاغلي پيرزاده وويل چې د هېواد پخواني لومړي وزیر ذوالفقار علي بوټو ته هم له هېواده بهر د روغتيايي ازموينو اجازه ورکړای شوې وه.

د پروېز مشرف وکيل له ځانګړې محکمې غوښتي د موکل محکمه دې د هغه تر ښه کېدو وځنډوي.

د پاکستان پخوانی ولسمشر جنرال پروېز مشرف د جنورۍ پر دويمه د زړه د ناروغۍ له کبله راولپنډۍ کې د زړه ناروغیو درملنې پوځي روغتون ته ولېږدول شو.

په پام کې وه، چې پرویز مشرف د خیانت قضیې په لړ کې محکمې ته وړاندې شي.

پر ښاغلي مشرف تور دی چې په ۱۹۹۷ کال کې يې د پاکستان اساسي قانون ځنډولی و.

ورته مطالب