اوکراین کې ولسمشر ویکټر یانکویچ کار ته ستنېږي

د انځور حقوق Reuters
Image caption د امنيتي ځواکونو او مظاهره چيانو ترمنځ د څو اوونيو مظاهرو له امله سلګونه کسان ټپيان شوي دي.

د یوکراین ولسمشر ویکتور یانکوویچ نن ( دوشنبه ) د ناروغۍ له امله له څلور ورځنۍ رخصتۍ وروسته خپل کار بیا پیلوي.

د حکومت مخالفین لا هم استعفا ته د هغه د اړکولو لپاره خپل کمپاین ته دوام ورکوي.

د یکشنبې په ورځ په پلازمینه کیېف کې د حکومت زرګونو مخالف لاریون کوونکي راټول شوي وو.

له بله پلوه مخکښ مخالف دیمیترو بولاتوف چې وايي د حکومت ضد لاریون پرمهال تښتول شوی او وهل شوی دی، د عاجلې درملنې لپاره د لیتوانیا په پلازمېنه ویلنیوس کې دی.

تېره اونۍ هغه په یوه تلویزیوني چینل په داسې حال کې راښکاره شوی و، چې په وینو ککړ او برسیرن ټپي و.

د یوکراین حکومت هغه د ګڼو خلکو په ګډون د مظاهرو په تنظیمولو تورن کړی او د هغه د نیولو امر یې کړی و.

له دې مخکې د اوکراين يوه مخکښ مشر پر لويديځ غږ وکړ، چې د ده په هېواد کې د سياسي کړکيچ له حل سره د مرستې په موخه نور ملاتړ وښيي.

ارسينې يتسينيوک ويلي و چې : ''اوکراين يو 'لارښود پلان' ته اړتيا لري، نه يوه 'پوځي قانون' ته''.

ښاغلي يتسينيوک دغه څرګندونې د جرمني د ميونيخ په امنيتي کنفرانس کې له بهرنيو مشرانو سره د خبرو پر مهال وکړې.

په اوکراين کې وروسته له هغه اړودوړ خپور شو، چې په نومبر مياشت کې ولسمشر ويکتور يانکوېچ له اروپايي ټولنې سره د روسيې په پلوۍ له موافقې ووت.

د تېرې جنورۍ وروستیو کې د اپوزيسيون مشر د حکومت هغه غوښتنه رد کړه، چې ده ته يې د مظاهرو د پای ته رسېدو په مقابل کې د صدارت څوکۍ منلې وه.

د اپوزيسيون مشرانو هغه مهال ويل تر هغه به خپلو مظاهرو ته دوام ورکوي، چې ولسمشر له واکه لرې شوی نه وي.

د امنيتي ځواکونو او مظاهره چيانو ترمنځ د څو اوونيو مظاهرو له امله سلګونه کسان ټپيان شوي دي.

راپورونه وايي چې په دغو مظاهرو کې تر اوسه درې مظاهره چيان وژل شوي هم دي.

ورته مطالب