د سعودي د استخباراتو مشر له دندې ګوښه شو

بندر بن سلطان د انځور حقوق AP
Image caption بندر بن سلطان په سوریه کې انجنیري لوستې ده، واشنګټن کې د سعودي عربستان سفیر هم تېر شوی دی.

د سعودي عربستان د یوه شاهي فرمان له مخې، د استخباراتو عمومي مشر، بندر بن سلطان له خپلې دندې ګوښه شوی او پرځای د هغه مرستیال یوسف بن علي الادریسي ګومارل شوی دی.

د شاهي ماڼۍ یوه خبرپاڼه کې راغلي، پاچا دا کار د بندر بن سلطان د غوښتنې پربنسټ کړی دی.

بندر بن سلطان په سوریه کې انجنیري لوستې ده.

بندر بن سلطان د ۲۰۱۲ جولای کې د استخباراتو د مشر په توګه وټاکل شو، او له ۲۰۰۵ کال راهیسې یې د سعودي عربستان د ملي امنیت د شورا عمومي منشي و.

تر هغه مخکې، د ۱۹۸۳ او ۲۰۰۵ کلونو ترمنځ د ۲۲ کلونو لپاره واشنګټن کې د سعودي د سفیر په توګه پاتې شوی.

د هغه په اړه ویل کېږي، چې سوریه کې د حکومت مخالفو وسله والو ملاتړی دی.

رویټرز خبري اژانس وايي بندر بن سلطان د روان کال له پیل راهیسې د ناروغۍ له کبله دندې ته نه دی تللی.

د امریکا په متحده ایالاتو کې یې یو جراحي عملیات هم شوی، بیا المغرب ته تللی دی.

لنډ ژوندلیک

بندر بن سلطان بن عبدالعزیز سعودي عربستان کې یو بانفوذه سړی و، چې د امریکايي سیاست په اړه یې ډېره تجربه لرله.

د انځور حقوق
Image caption د استخباراتو مرستیال یوسف بن علي الادریسي د بندر بن سلطان ځای ناستی شوی.

نوموړی د ۱۹۴۹ کال د مارچ پر دویمه د سعودي طائف ښار کې زیږېدلی، پلار یې سلطان بن عبدالعزیز د ۲۰۱۱ اکتوبر کې مړ شوی.

شهزاده بندر بن سلطان د سعودي د بهرنیو چارو د وزیر سعود الفیصل له خور شهزادګۍ هیفاء الفیصل سره واده کړی، څلور زامن او څلور لوڼې لري.

د سعودي عربستان دغه سیاستوال پوځي تجربه لري، د برتانیا د شاهي هوايي ځواکونو له پوهنځي فارغ شوی، چې بیا وروسته په ۱۹۶۸ کال د ۱۷ کلونو لپاره یې د سعودي هوايي ځواک کې د جنګي پیلوټ په توګه هم دنده مخته وړې ده.

په ۱۹۸۰ کال کې د واشنګټن له جونز هوپکنز پوهنتون د ماسټرۍ سند ترلاسه کړی.

ورته مطالب