د سوريې په حمص کې چاودنو ۳۷ کسان وژلي

د انځور حقوق
Image caption دولتي چارواکو د چادونو پړه پر هغو کسانو اچولې چې دوی یې ترهګر بولي

په سوریه کې چارواکي وايي چې په حمص ښار کې چاودنو لږترلږه ۳۷ کسان وژلي دي. په چادونو کې یوه یې د موټر بم وه چې ګڼ کسان په کې ټپیان شوي هم دي.

تر دې وړاندې په پلازمېنه دمشق کې پر تخنیکي انستيتيوت د هاوان په برید کې لږترلږه ۱۴ کسان ووژل شول او له ۸۰ ډېر نور ټپیان شول.

دا بریدونه یوه ورځ وروسته له هغه کېږي چې ولسمشر بشارالاسد د ولسمشرۍ راتلونکو ټاکنو ته رسماً ځان کاندید کړ او هغه غوښتنې یې و نه منلې چې وايي د سوریې د کړکېچ د پای ته رسولو لپاره دې نوموړی استعفا ورکړي.

په دې چادونو کې د وژل شویو کسانو د شمېر په اړه بېلابېل رپوټونه ورکړل شوي دي.

دولتي چارواکي د ۳۷ کسانو مړینه او ۸۵ نورو د ټپي کېدو خبره تاییدوي.

په سوریه کې د بشري حقونو د څار ډله هم همدا شمېر ښيي، خو د فرانسې خبرې اژانس د یوه سیمه ییز چارواکي له خولې وايي چې ۴۵ کسان وژل شوي دي.

دولتي چارواکو د چادونو پړه پر هغو کسانو اچولې چې دوی یې ''ترهګر'' بولي.

دا چادونې وروسته تر هغه وشوې چې د بشري حقونو د څار ډلې د سوریې دولتي ځواکونه تورن کړل چې د حلب ښار په شمال کې یې بېرلي بمونه کارولي دي.

نوموړې ډله وايي د دغو بمونو کارول چې له امله یې ګڼو خلکو ته مرګ ژوبله اوړي ناسم دی.

په سوریه کې د بشري حقونو د څار ډله وايي وروسته له هغه چې د فبرورۍ په میاشت کې ملګرو ملتونو غوښتنه وکړه چې د بېرلي بمونو کارونې ته دې د پای ټکی کېښودل شي یوازې په حلب ښار کې ۸۵ بيرلي بمونه کارول شوي دي.

د یادولو وړ ده چې حمص ښار د دولتي ځواکونو او یاغیانو ترمنځ د جګړې په ډګر بدل شوی او په دې توګه د دې ښارې ډېر برخې په جګړو کې ویجاړې شوې دي.

ورته مطالب