یمن کې پر دولتي ودانیو ډله ییز بریدونه شوي

د انځور حقوق Reuters
Image caption حضرموت سیمه د وسله والو پیاوړی مرکز بلل کېږي.

د یمن په سویل کې ګڼ شمېر وسله والو چې ګمان کېږي د القاعده ډلې وسله وال دي، تېره شپه په دولتي ودانیو او د پوځ پر پوستو بریدونه وکړل.

ویل کېږي، چې په پایله کې یې له ۲۰ زیات کسان ووژل شول.

وسله والو دغه راز د سیون ښار د پولیس پر عمومي مرکز او د مرکزي بانک پر څانګه برید وکړ او دغه څانګه یې لوټ کړه.

وسله والو د یو څه وخت لپاره ځینې ودانۍ ونیولې خو د پوځي ځواکونو له غبرګون وروسته بېرته په شا شول.

ځینې راپورونه وايي چې ولسمشر عبد ربه منصور په سیمه کې د پوځ مشر له دندې ګوښه کړی.

دا برید په دا وروستیو کې په حضرموت ولایت کې د وسله والو وروستی برید دی، حضرموت د وسله والو قوي مرکز بلل کېږي.

د روانې مې میاشتې په پیل کې یمني پوځ ادعا وکړه، چې د القاعده وسله والو پر ضد عملیاتو کې یې د دغې ډلې ۳۷ وسله وال وژلي دي.

د یمن دفاع وزارت په وینا د هېواد په سویلي سیمو کې یې د عمالیاتو پر مهال د القاعده اړوند له ۳۰ ډېر کسان ووژل.

ویل کېږي، چې دغو عملیاتو پایله کې لږ تر لږه ۶ پوځیان هم وژل شوي دي.

د چارواکو په خبره د ابین او شبوه سیمو کې یې د عملیاتو پایله کې ۳۷ وسله وال ووژل.

د القاعده دغه غړي افغانستان او پاکستان کې د القاعده ضد عملیاتو پایله کې دغې سیمې ته لاړل او د هېواد پر یوه لویه برخه یې ولکه ټینګه کړې وه.

یمن کې حکومتي چارواکي وايي، دوی د دغې ډلې ځپلو هڅې کوي او وايي هغه سیمې د دوی له ولکې وباسي، چې مخکې یې پرې کنترول تر لاسه کړی و.

ورته مطالب