مصر کې د ولسمشرۍ ټاکنو رایې اچوونې بهیر روان دی

د انځور حقوق Reuters
Image caption زرګونه سرتېري د امنیت ټینګښت لپاره ګومارل شوي دي.

په مصر کې رایه اچوونکي د دغه هېواد د نوي ولسمشر د ټاکلو په موخه په دوه ورځنیو ټاکنو کې برخه اخلي.

دا ټاکنې په داسې وخت کې تر سره کېږي، چې د هېواد په بېلابېلو سیمو کې امنیتي عملیات روان دي.

تمه ده چې د پوځ پخوانی مشر عبدالفتاح السیسي به په دغو ټاکنو کې ستر بری خپل کړي. نوموړي د تېرو ټاکنو په ترڅ کې ټاکل شوی اسلامپالی ولسمشر محمد مرسي له واکه لرې کړی و.

له هغه وخته راهیسې ښاغلي السیسي د اخوان المسلمین ګوند د غړو پر ضد د عملیاتو لارښوونې کړې، چې په ترڅ کې یې لسګونه زره کسان نیول شوي او سلګونه نور د مرګ په سزا محکوم شوي دي.

نوموړی اوس په ټاکنو کې د یوه ملکي وګړي په توګه سیالي کوي.

د نوموړي یوازنی سیال تجربه لرونکی کیڼ اړخی سیاستوال حمدین صباحي دی.

له دې مخکې ولسمشریزو ټاکنو ته نوماند عبدالفتاح السیسي ویلي وو، که په راتلونکو ټاکنو کې ولسمشر شي، نو د اخوان المسلمین ګوند جرړې به وباسي.

د ښاغلي سیسي په وینا، چې د هغه د وژلو دوې هڅې یې شنډې کړې دي.

نوموړي له سي بي سي مصري تلویزیون سره په خبرو کې ویلي وو، د مصریانو عزم دی دې ته اړ کړ، چې ولسمشرۍ ته نوماند شي، چې په وینا یې"دا د خلکو غوښتنه وه، د عامو مصریانو غوښتنه وه".

السیسي چې د محمد مرسي لخوا د دفاع وزیر ټاکل شوی و، د مخکني منتخب ولسمشر مرسي پرضد یې پوځي کودتا وکړه او محمد مرسي یې بندي کړ. السیسي دا نه مني، چې ګني د اخوان المسلمین د کاندید محمد مرسي په پرځولو یې سیاسي واک ته د رسېدو لمن غوړولې وه.

د مرسي له لیرې کېدا وروسته، د مصر په ناامنیو کې تر ۱۰۰۰ ډېر کسان وژل شوي او د اخوان المسلمین ګوند زرګونه غړي او پلویان نیول شوي او بندیان شوي دي.

په وروستیو کې د مصر واکمن نظام اخوان المسلمین ګوند د ترهګرو ډلو په ډله کې راوست.

کابو دوه لکه امنیتي کسان په ټول هېواد کې د ټاکنیزو مرکزونو د امنیت خوندي کولو په موخه ګومارل شوي دي.

ورته مطالب