ناټو: افغان ماموريت به له ٢٠١٥م کال وروسته هم دوام وکړي

Image caption یوې افغان سرچینې وویل، د افغانستان د دفاع وزیر بسم الله محمدي به په غونډه کې پر افغانستان د پاکستاني توغندیو د ګوزارونو مسله هم راپورته کړي

د ناټو سرمنشي اندرې فو راسموسن وايي هیلمن دی چې تر ۲۰۱۵م کاله وروسته به هم په افغانستان کې د دوی ماموریت دوام وکړي او دوی به د شرایطو په پام کې نیولو سره د افغان امنیتي ځواکونو روزنې ته دوام ورکړي.

ښاغلي راسموسن دا څرگندونې د بلجیم په پلازمېنه بروکسل کې د ناټو د دفاع وزیرانو په دوه ورځنۍ غونډه کې وکړې چې نن سه شنبه( د جون ۳مه) پیل شوه.

نوموړي زیاته کړه د ناټو د ماموریت دوام یوۀ قانوني چوکاټ رامنځ ته کولو ته اړتیا لري.

د نوموړي اشاره د افغانستان او امریکا تر منځ دوه اړخیز تړون ته وه او هیله یې وښوده چې راتلونکی افغان ولسمشر به دا تړون د خپل کار په لومړنیو ورځو کې لاسلیک کړي.

د ناټو په مقر کې یوې افغان سرچینې وویل، د افغانستان د دفاع وزیر بسم الله محمدي به په غونډه کې پر افغانستان د پاکستاني توغندیو د ګوزارونو مسله هم راپورته کړي.

يادې سرچينې زیاته کړه، افغانستان به د ناټو له دفاع وزيرانو وغواړي، چې د پاکستان د دغو بريدونو پر وړاندې غبرګون وښيي او پر پاکستان فشار راوړي، چې له داسې بريدونو لاس واخلي.

په دې غونډه کې چې د ناټو ۲۸ غړو هېوادونو د دفاع وزیران، د ايساف همکارو هېوادونو د دفاع وزيران، د افغانستان د دفاع وزير، په افغانستان کې د ناټو ملکي استازی، د ايساف قوماندان، د ملګرو ملتونو ځانګړی استازی او د اروپايي ټولنې د بهرنيو اړيکو د کمیسيون مشره کترين اشټون ګډون کوي.

د ناټو سازمان وياندې اووانا لنګوسکي وويل، افغانستان به د دې غونډې له مهمو موضوعاتو څخه وي.

هغې زياته کړه چې په دې غونډه کې د افغانستان امنيتي حالت، د ايساف د پای ته رسېدونکي ماموريت او تر ۲۰۱۴ کال وروسته د ناټو د نوي ماموريت په اړه خبرې کېږي.

پرون دوشنبه( جون ۲مه) د ناټو یوۀ لوړ پوړي چارواکي له افغانستانه راغلو خبریالانو ته وویل، د افغانستان په اړه به له ۲۰۱۴م کاله وروسته د افغانستان د حالاتو ارزونه، له نړیوالې ټولنې سره د افغانستان پر همکارۍ، له افغانستان سره په سیاسي او نظامي همکارۍ او د ناټو هغه ماموریت ارزول کېږي چې همدا اوس په افغانستان کې په کې ښکېل دی.

نوموړي چارواکي وویل، د ولسمشر اوباما د اعلان سره سم به په افغانستان کې تر لس زرو کم امریکایی سرتېري پاتې کېږي او د ۲۰۱۵م کال په جنورۍ کې به ناټو د افغانستان د پوځ د روزنې او سلامشورو بهیر ته دوام ورکړي، ځکه پوځي ماموریت پای ته رسېږي.

د انځور حقوق AFP
Image caption ښاغلي راسموسن هيله وښوده چې نوی افغان ولسشمر به له امریکا سره دوه اړخیز امنیتي تړون لاسلیک کړي

تر هغه سملاسي وروسته به په افغانستان کې د ایساف ماموریت هم څرګند شي او له افغانستان سره به د مشارکت بهیر دوام ولري.

نوموړي د یوۀ خبریال د پوښتنې په ځواب کې چې په افغانستان کې د بشپړ حضور ختمولو غوراوی شته او کنه، وویل نه داسې څه نشته او په هرصورت به اجازه ورنه کړي چې د تېرو ۱۲کلونو لاس ته راوړنې په اوبو لاهو شي.

هغه وویل، ناټو افغان ځواکونو ته روزنه ورکوي خو د مالي لارو چارو برابرول د ناټو دغړو هېوادونو دنده ده.

ناټو په افغانستان کې د ټاکنو د لومړي پړاو له امنیته خوښ دی چې افغان ځواکونو یې د امنیت ساتلو دنده لرله.

ناټو د ټاکنو دویم پړاو با امنه سر ته رسېدو ته سترګې پر لاره ده.

د بروسلز اوسنۍ غونډه پر اوکراین د روسیې د تېرې تر پیل وروسته لومړنۍ غونډه ده او دوی به پر دې بحث وکړي چې د روسیې پوځي ګام ته کوم غبرګون وښيي.

د ناټو د دفاع وزیرانو بله غونډه په سپتمبر کې د برتانيا په وېلز کې کېږي.

ورته مطالب