د کراچۍ پر هوايي ډګر برید ۲۸ کسان وژلي

د کراچۍ پر هوايي ډګر برید د انځور حقوق AFP GETTY
Image caption ویل کېږي، زیاتره وژل شوي د هوايي ډګر ساتونکي دي.

د پاکستان سند ایالت کراچۍ ښار پر نړیوال هوايي ډګر ډله ییز ځانمرګی برید تر څه باندې پنځو ساعتونو وروسته پای ته ورسېد، چې د لسو برید کوونکو په ګډون لږترلږه ۲۸ کسان پکې وژل شوي دي.

د کراچۍ ښار چارواکي او پولیس وايي، اوس پر هوايي ډګر برید پای ته رسېدلی دی.

د جناح روغتون د بېړنیو پېښو د څانګې ډاکټر سیمي جمالي ویلي، دوی ته شپاړس مړي وروړل شوي، چې لس په کې د هوايي ډګر ساتونکي دي، څلور د پي آی اې کارکوونکي دي.

د برید انځورونه

دوی وايي، چې روغتون ته په برید کې د لسو وژل شویو کسانو مړي نه دي وړل شوي.

ډاکټر سیمي وايي، په برید کې ۲۳ کسان ټپیان شوي، چې د دوو ټپیانو روغتیايي وضعیت د اندېښنې وړ دی.

د پاکستاني پوځ یوه ویاند ویلي، د برید مقابلې ته د پاکستان کومانډو ځواکونه هم ورغوښتل شوي وو.

د دغه نړیوال هوايي ډګر ټولې الوتنې د پاکستان نورو هوايي ډګرونو ته لېږدول شوې دي.

تر اوسه په برید کې د هوايي چلند او یا مسافرو د وژل کېدو خبر نه دی ورکړل شوی.

ویل کېږي، چې په وژل شویو کې زیاتره د هوايي ډګر ساتونکي او ځینې یې د هوايي چلند کارکوونکي دي.

د پاکستان ډان خبري اژانس وايي، وسله والو لومړی د هوايي ډګر یوه دروازه الوځولې او بیا یې بریدونه کړي دي.

د انځور حقوق AFP
Image caption د پاکستان ډان خبري اژانس وايي، وسله والو لومړی د هوايي ډګر یوه دروازه الوځولې او بیا یې بریدونه کړي دي.

برید کوونکو له جعلي کارتونو په ګټې اخیستو ځانونه هوايي ډګر ته ننویستي او اغزن تارونه یې له منځه وړي دي.

پاکستاني طالبانو د کراچۍ پر هوایي ډګر د برید پړه پر غاړه اخیستي، چې وايي دا برید یې د خپل مشر حکیم الله مسید د مرګ د غچ اخیستو په غبرګون کې کړی دی.

د طالبانو ویاند شاهد الله شاهد له وزیرستان نه د تیلیفون په کرښه خبریالانو ته وویل، دوی د خپلو ملګرو د وژنې غچ اخیستو حق لري.

د هوايي ډګر له ترمینال څخه لوګی پورته کېږي.

'سوځېلې الوتکه'

د هوايي ډګر د ساتونکو ویاند مخکې د فرانسې خبري اژانس ته ویلي وو، چې وسله وال ځغاستلیکې ته رسېدلي دي.

د انځور حقوق AFP
Image caption دغه برید تر پنځو ساعتونو ډېر دوام وکړ.

په هوايي ډګر کې د دوو لویو چاودنو خبر هم ورکړل شوی دی، خو د پوځ ویاند جنرال عاصم باجوه وایي برید کې ټولې الوتکې او نور مهم توکي خوندي دي

هوايي ډګر ته څېرمه د حمّاد په نامه یوه ډیپلومات بي بي سي ته ویلي د خپل کور بام ته په ختلو سره یې په هوايي ډګر کې یوه الوتکه د سوځېدلو په حال کې ولیده.

خو وروسته پوځ وویل، چې الوتکه ویجاړه شوې، خو د تېلو ذخیره تر کنټرول لاندې راغلې ده.

د کراچۍ د هوايي چلند یوه چارواکي سرمد حسین ویلي "په خپل دفتر کې په کار بوخت وم، چې د سترو چاودنو غږونه مې واورېدل، بیا وروسته ډزې پیل شوې".

دی وايي، له خپل یوه ملګري سره له کړکۍ په ټوپ اچولو وتښتېدل، خو د ملګري پښه یې ماته شوه.

د هوایې ډګرد تېلو په یوه زېرمه کې اور لګېدلی. امنیتي چارواکي وایي وسله وال چې ویل کیږي د هوایي ډګر د امنیتي ځواکونو یونیفورم یې اغوستی و، تېره شپه ناوخته په یوه موټر کې هوایي ډګر ته په رسېدو یې لومړی لاسي بمونه غورځولي او بیا یې ډزې پیل کړې.

حکومت د هېواد په نورو هوایي ډګرونو کې امنیت ټینګ کړی دی.

د انځور حقوق AFP GETTTY
Image caption له پوځ نه د برید د شنډولو غوښتنه شوې ده

د جګړې له کبله د کراچۍ له هوایي ډګر نه شاوخوا ۲۰ الوتنې ځنډول شوې دي.

'ازبک برید کوونکي'

د نیمه پوځي ځواکونو مشر رضوان اختراختر وایي، ښکاري چې برید کوونکي ازبک وي، خو د پېژندلو لپاره به د وژل شویو بریدګرو ډي این اې ازموینې وشي.

د کراچۍ هوايي ډګر له ترمینال نه د اقتصادي الوتکو کار نه اخیستل کېږي، خو له هغه ځایه د پي آی اې بار وړونکې الوتکې الوځي.

پاکستان له څه باندې لسو کلونو راهیسې له اسلامپالو سخت دریځو سره لاس او ګرېوان دی.

د پاکستان لومړي وزیر نواز شریف په وروستیو کې بي بي سي ته ویلي وو، له وسله والو سره د سولې خبرو ته چمتو دی.

وړاندې په کراچۍ کې هم اورپکو ډېر بریدونه کړي دي.

په ۲۰۱۱ کې، په وسلو سمبالو کسانو د پاکستان مهران سمندري ځواکونو پر یوې اډې په ۱۷ ساعته برید کې لږترلږه ۱۰ کسان ووژل او دوې الوتکې یې ویجاړې کړې.

ورته مطالب