جان کیري د 'اسلامي دولت' ضد ملاتړ لپاره عراق ته رسېدلی

د انځور حقوق AP
Image caption ښاغلی کیري د منځني ختيځ د سفر په اوږدو کې سعودي عربستان او د سیمې نورو هېوادونو ته هم سفر کوي.

د امریکا د بهرنیو چارو وزیر جان کېري د منځني ختيځ په سفر خپل لومړي تمځي عراق ته رسېدلی دی.

تمه ده، چې ښاغلی کیري به د ''اسلامي دولت'' پروړاندې د امریکا د ملاتړ ډېرولو هڅې وکړي.

اټکل دی، چې ښاغلی کیري به د عراق له نوي لومړي وزیر حیدر العبادي سره وګوري.

کیري په عراق کې د ملي حکومت تر جوړېدا ایله څو ساعته وروسته عراق ته رسېدلی دی.

امریکا د ''اسلامي دولت'' د جنګیالیو پروړاندې د یوه ایتلاف د جوړولو په هڅه کې ده.

''اسلامي دولت'' د عراق له درو برخو یوه نیولې ده، خو په سوریه کې یې هم ځینې مهمې سیمې تر ولکې لاندې دي.

ولسمشر اوباما ویلي، د ''اسلامي دولت'' پروړاندې د پراخ پوځي ګام اخیستو واک لري.

نوموړي دا څرګندونې د امریکا د کانګرس له مشرانو سره په لیدنه کې کړې دي.

د انځور حقوق
Image caption اسلامي دولت د عراق او سوریې زیاتره برخې نیولې دي.

سپینې ماڼۍ په یوه اعلامیه کې ویلي چې ولسمشر اوباما "د کانګرس مشرانو ته وویل، داسې لازم واک لري، چې په عراق او سوریه کې د "اسلامي دولت" پروړاندې بریدونه پراخه کړي، د هغه اشاره دې ته وه چې د دغې پرېکړې په اړه د کانګرس موافقه ضرور نه ده."

''اسلامي دولت'' د عراق او سوریې د ځینو برخو تر نیولو وروسته د ''خلافت'' جوړولو اعلان وکړ.

په وروستیو کې ''اسلامي دولت'' د امریکايي بریدونو په غبرګون کې له دوو امریکايي خبریالانو سرونه غوڅ کړل.

ښاغلی کیري د منځني ختيځ د سفر په اوږدو کې سعودي عربستان او د سیمې نورو هېوادونو ته هم سفر کوي.

په پام کې ده چې ښاغلی کیري به له دغو هېوادونو د ''اسلامي دولت'' پروړاندې د پوځي، سیاسي او مالي ملاتړ غوښتنه وکړي.

پر همدې مهال، په لندن کې د سعودي عربستان سفیر شهزاده محمد بن نواف دا ادعا رد کړه، چې ګني حکومت یې د "اسلامي دولت" ډلې ملاتړ کوي او یا مالي مرسته ورسره کوي.

نوموړي په یوه ویناپاڼه کې ویلي: "دا د نړیوالې ښکېلتیا کمی دی، چې ترهګریزو خوځښتونو ډېرېدو ته یې لاره هواره کړه، چې اوس په سوریه او عراق کې د پیاوړتیا په حالت کې دي."

"موږ مخکې هم له نړیوالې ټولنې غوښتي، چې د ترهګریزو سازمانونو او ډلو د مالي ملاتړ موندلو او د سرچینو وچولو په برخه کې پیاوړی ګام واخلي."

ورته مطالب