"د لمر وړانګې وزن کمولو کې مرسته کولی شي"

Image caption ساینس پوهانو موندلې چې د لمر وړانګو کې ساتل شوي موږکانو په پرتلیز ډول لږ خواړه خوري.

پر موږکانو ترسره شوې یو څېړنه ښیي چې د لمر وړانګې ښايي د وزن په کنترولولو او د دوهم ډول د شکرې ناروغۍ په مخنیوی کې مرسته وکړي.

د بریتانیې او استرالیا ساینس پوهانو موندلې چې د لمر وړانګو کې ساتل شوي موږکانو په پرتلیز ډول لږ خواړه خوري.

خو څېړنه وايي داسې ښکاري چې د لمر وړانګو په پایله کې بدن کې تولیدېدونکې ويټامین ډي په دې چاره کې کوم رول نه درلود.

کارپوهانو ویلي نورو څېړنو ته اړتیا ده چې وموندل شي ایا د لمر وړانګې پر انسانانو هم ورته اغېز لرلی شي.

څېړنیزې ډلې ویلي پایلو سره باید احتیاط وشي ځکه موږکان خپل ډېری فعالیت د شپې له خوا کوي او د لمر وړانګو ته دومره نه څرګندېږي.

د ماورای بنفش په مټ تر درملنې وروسته په موږکانو کې د دوهم ډول د شکرې ناروغۍ د ګواښ کچه هم په پرتلیز ډول ټيټه وه.

ساینس پوهان وايي د ماورای بنفش په مټ درملنه له نایتریک اوکساید سره تړاو لري چې په پوستکي کې د لمر وړانګو ته له څرګندېدو وروسته پیدا کېږي.

د دغه ترکیب لرونکی کریم چې کله د موږکانو په پوستکي وکارول شو نو ورته اغېز یې درلود.

د ايډنبره پوهنتون مشر استاز ډاکټر ریچرډ وېلر وايي:

"موږ د تېرو څېړنو پر بنسټ په دې پوهېږو کوم کسان چې د لمر وړانګو ته ډېر څرګندېږي تر هغو یې عمر اوږد وي چې په سیوري کې ژوند تېروي. دغه وروستۍ څېړنه موږ ته د لمر د ګټو په اړه لا نور مالومات راکوي".

"موږ باید په یاد ولرو چې د پوستکي سرطان د مړینې یوزاینۍ لاره نه ده او ځکه نو زه فکر کوم چې د لمر د وړانګو او د زیانونو په اړه یې باید په خپلو خبرداریو کې انډول وساتو".

استرالیا کې د ټېلیتون په نامه د ماشومانو د روغتون یوه مشره ډاکټره شیلي ګورمن وايي څېړنه ښيي چې د لمر وړانګې د ښې روغتیا یو مهم عنصر دی.

نوموړې وايي: "څېړنه څرګندوي چې د لمر وړانګو ته ځان څرګندول، په کافي اندازه ورزش او صحي خواړه خوړل ښايي د ماشومانو د چاغېدو مخه ونیسي".

د صحي خوړو کارپوه ډاکټر کولین میچي بیا وايي د لمر د وړانګو ګټې لا له وړاندې ټولو ته مالومې وې ځکه نو دا وروستۍ لاسته راوړنې د حیرانتیا وړ نه دي.

خو نوموړی مني چې سره له دې هم څېړنه ډېر ارزښت لري.

دی وايي: "څېړنه له موږ انسانانو ځینې مهمې پوښتې لري لکه ایا د موږکانو په څېر د لمر وړانګې په موږ کې هم ورته اغېز لرلای شي".

ورته مطالب