ډاکتران وايي له برېښنايي الو لوستل روغتيا او خوب خرابوي

د انځور حقوق thinkstock
Image caption نوې څېړنې ښي چې له برېښنايي الو لوستل روغتيا او خوب ته زيان رسوي

ډاکترانو په ډاګه کړې ده که چېرې تاسو د خوب په وخت کې تر بړستنې لاندې برېښنايي لوستونکي کاروی دا ستاسو پر روغتيا او خوب بد اغېز کوي.

د هارورډ روغتيايي برخې، د برېښنايي او کاغذ له مخې لوستل څېړلي دي. د دوی څېړنو دا ښودلې ده هغه کسان چې برېښنايي لوستونکي الې کاروي نشي کولای په اسانۍ سره ويده شي او سبا سهار د ستړيا احساس کوي.

کارپوهانو خبرداری ورکړی، خلک بايد د شپې له خوا له تېزې رڼا څخه ځان وساتي، ځکه له خوب مخکې تېزه رڼا د صحت لپاره يوه د تشويش وړ خبره ده.

د څېړنو لپاره دوولس کسان د دوو اونيو لپاره د خوب په لابراتوار خونه کې بند کړل شوي وو. دغو کسانو پنځه ورځې د کاغذ له مخې او پنځه ورځې له له ای پډ (IPad) څخه لوستل کول.

د دوی د وينو نمونې ښودلې چې له برېښنايي الو لوستل د دوی د خوب هارمونونه کم کړي وو او ويده کېدلو يې هم ډېر وخت اخيستی و.

څېړنو دا هم ښودلي چې نورې برېښنايي لوستونکې الې لکه نوک او کېنډل فاير د انسان پر صحت همدا ډول بد اغيز اچوي.

دغه څېړنې د پروسېډېنګ اف د نشنل اکډيمي اف ساينس (Proceedings of the National Academy of Sciences) په نامه جورنال کې خپرې شوې دي.

د څېړونکو مشر پروفيسور چارلس سيزر، بي بي سي ته وويل له برېښنايي لوستونکو الو خپرېدونکې رڼا سيخ په سترګو پرېوځي، خو له کاغذي هغه منعکسه رڼا ده چې د سترګو او صحت لپاره زيان نشي لرلی.

کم خوب کېدای شي چې د زړه او مېټابوليکو نارغيو لکه د وزن زياتوالي، شکرې او د سرطان په اخته کېدو خطره نوره هم زياته کړي

ډاکترې ويکټوريا ريول د برتانيې د سرې (Surrey) پوهنتنون د برېښنا د د تاثيرونو د څانګې مشرې وويل دا څېړنې ډېرې مهمې دي او مونږ بايد ټول خلک او په خاصه توګه ماشومان دې ته وهڅو چې له برېښنايي لوستونکو الو د تېزې خپرېدونکې رڼا ځان وژغوري.