ایټالیايي سمندري ځواکونو ۳۳۰۰ کډوال ژغورلي دي

د انځور حقوق AP
Image caption ملګري ملتونه وايي د سږ کال له پیله تر اوسه نژدې ۴۰ زره کسانو هڅه کړې، چې د روم له سمندره تېر شي

د ایټالیا سمندري ځواکونو ویلي، د جمعې په ورځ یې له ۳۳۰۰ ډېر کډوال ژغورلي، چې وايي هڅه یې کوله کښتیو کې د روم له سمندر نه تېر شي.

دوی وايي سمندر کې یې د چاڼیزو عملیاتو بهیر کې له کښتیو نه ۱۷ مړي موندلي او له همدې کښتیو نه یې ۲۱۷ کسان ژوندي ژغورلي دي.

د ایټالیا سمندري ځواکونو ویلي د جمعې په ورځ دوی ته له ۱۷ کښتیو نه شکایتونه ورکړل شوي وو.

د کډوالو نړیوال سازمان ای او ایم په خبره تر اوسه روم سمندر کې لږ تر لږه ۱۸۲۶ کډوال وژل شوي دي.

د دغې ادارې مسوولین وايي د تېر کال همدومره مودې پرتله د سږ کال مړینې ۳۰ سلنه ډېرې دي.

د انځور حقوق Press Association
Image caption د کډوالو شمېر ډېروالي یو سبب په لیبیا کې روان کړکيچ بلل کېږي

د ایټالوۍ ورځپاڼې ( کوریري دیلا سیرا ) په رپوټ کې ویل شوي، چې ډېری کډوال د لیبیا ساحل ته نژدې ژغورل شوي دي.

د ورځپاڼې په وینا کښتۍ کې د ایسارو کسانو ژغورنې په دغو هڅو کې د ایرلنډ، جرمني او بلجیم بیړیو برخه درلوده.

ملګري ملتونه وايي د سږ کال له پیله تر اوسه نژدې ۴۰ زره کسانو هڅه کړې، چې د روم له سمندره تېر شي.

د کډوالو شمېر ډېروالي یو سبب په لیبیا کې روان کړکيچ بلل کېږي. دې سره د کډوالۍ سفر هم له همدغې سیمې پیلیږي، ځکه په سیمه کې موسم په نسبي ډول معتدل دی.

د پنجشنبې په ورځ د ' بې پولې ډاکټرانو سازمان ' ویلي و، چې له یوې کښتۍ نه یو کس ژغورل شوي، چې وايي ۱۳ ورځې مخکې یې له مصر نه سفر پیل کړی و.

دغه سړی د سسلي په اګسټا کې ژغورل شوی دی.

په اروپا کې د پناغوښتونکو او کډوالو د مېشتولو مساله یوه ناندریزه موضوع ده.