د سوريې پوځ د حزب الله او روسيې په مرسته پرمختګ کړی

د انځور حقوق Reuters
Image caption ويل کېږي د روسيې ډېری هوايي بريدونو پر هغو یاغيانو چې د اسلامي دولت او حکومت پر وړاندې جنګېږي شوي دي

ويل کېږي د سوريې ځواکونو د لبنان حزب الله جنګياليو او د روسيې هوايي بريدونو په مرسته د ياغيانو پر وړاندې پرمختګ کړی دی.

راپورونه وايي دولتي ځواکونو په ادلب، استان، حما او ذقيه ولايتونو کې نورې سيمې لاندې کړې دي.

د روسيې پوځ په وينا په تېرو ۲۴ ساعتونو کې يې د سوريې په حما، ذقيه، حلب او رقه ولايتونو کې له ۶۰ زيات هوایي بريدونه کړي او اسلامي دولت نومې ډله يې مهم هدف و.

خو ويل کېږي د روسيې ډېری هوايي بريدونو پر هغو یاغيانو چې د اسلامي دولت او حکومت پر وړاندې جنګېږي شوي دي.

د سوريي ياغيان او لوېديځ هېوادونه وايي روسيه ډېری د اسلامي دولت ډلې پر ځای پر نورو هدفونو هوايي بريدونه کوي.

وړاندې د متحدو ايالتونو ولسمشر بارک اوباما په سوريه کې د روسيې هوايي بريدونه د اندېښنې وړ بللي او وايي دا يوازې د اسلامي دولت ډلې له غښتلي کېدو سره مرسته کوي.

ده ويلي وو چې "روسيه د اسلامي دولت نومې ډلې او حکومت مخالفو منځلارو تر منځ توپير نه کوي".

اوس د جګړې ميدان له مهمې لوې لارې سره نژدې پروت دی چې پلازمېنه دمشق له نورو لويو ښارونو لکه حلب سره نښلوي.

د روسيې له نظامي مداخلې وړاندې حلب تقريبا په پوره ډول د ياغيانو تر ولکې لاندې و او دوی وايي هوايي بريدونه يې د سوريې له حکومتي ځواکونو سره په همغږۍ ترسره کېږي.

ښاغلي پوتين ويلي چې په سوريه کې د دوی مداخله په منځني ختيځ کې د دواړو سني او شيعه مسلمانانو په ګټه ده.

د حکومتي ځواکونو پرمختګ خبره دمشق او مخالفو فعالانو منلې ده.

د امريکا ايتلافي ځواکونه وايي دوی هم د شنبې په ورځ په سوريه او عراق کې د اسلامي دولت نومې ډلې پر هدفونو ګڼ بريدونه کړي دي.

ورته مطالب