اسرائیلو کې اسپانوی پیلوټ: "فلسطین ته ښه راغلاست"

د انځور حقوق Reuters

د اسپانیا هوايي چلند (ایبیریا) د خپل یوه پیلوټ په اړه هغه شکایت څېړي، چې اسرائیلو ته يې د رسېدو پروخت ویلي وو "فلسطین ته ښه راغلاست".

د الوتکې سپرلۍ ویلي، پیلوټ په اسپانوۍ او بیا په انګرېزۍ ژبه وویل، چې الوتکه کوزېږي، خو د فلسطین یا اسرائیلو نوم یې وانخیست.

د ایبیریا ویاندې ویلي، د یادې الوتکې له عملې سره څېړنه روانه ده، او له پیلوټ نه یې د "ناسم پوهاوي" په اړه بښنه غوښتې ده.

ویاندې بي بي سي ته ویلي، د شرکت هدف دا دی چې "کارکوونکي مو په خیر خپل منزل ته ورسېږي، دوی که د هر هېواد وي، د هر قوم وي او د هر دین پیروان وي".

ویل کېږي کله چ ېد ایبریا اړوند ۳۳۱۶ شمېره الوتنه او الوتکه په تل ابیب کې د تېرې چارشنبې په ورځ (اکتوبر ۲۸مه) د بن ګوریون پر هوايي ډګر کښېناسته، دا خبرې ورسره اضافه شوې، چې ګني پیلوټ اعلان وکړ چې "فلسطین ته ښه راغلاست".

دا خبر بيا په اسرائیلي خبري رسنیو کې خپور شو.

د لیور په نامه یوه اسرائیلي مسافر د اسرائیلو دویم تلوېزیون ته ویلي: "موږ ټکان وخوړ. پوی نه شوم چې هغه ولې داسې وویل".

نوموړی زیاتوي: "موږ په اسرائیلي دولت کې اوسېږو او ده باید ویلي وای چې اسرائیل. هغه یوازې په انګلیسي خبرې وکړې. دا کار په لوی لاس شوی".

یوه بل مسافر ایبیریا شرکت ته شکایت کړی چې: "ما او کورنۍ مې د ډېر سپکاوي احساس وکړ. دا کار هېڅ د منلو نه و. هغه شرکت ته ډېر سپکاوی وکړ".

د شرکت ویاندې ویلي: "له څېړنې وړاندې موږ دا ویلی شو چې له ناسم پوهاوي بښنه غواړو".