اسراييلو کې دوو جلا بريدونو کې ۵ کسان وژل شوي

د انځور حقوق Reuters
Image caption د راپورونو له مخې د تاوتريخوالي په تېرو دوو مياشتو کې ۱۵ اسراييليان او لسګونه فلسطينيان وژل شوي دي

چارواکي وايي په اسراييلو او اشغال شوې لويديځه غاړه کې په دوو جلا بريدونو کې لږترلږه پنځه کسان وژل شوي دي.

په لومړي بريد کې د تل ابيب ښار کې د يوې هټۍ مخې ته يوه فلسطيني دوه اسراييليان د چاقو په وسيله وژلي دي.

په دويم بريد کې چې هغه هم په اسراييلو کې شوی يو اسراييلی، يو يهود-امريکایی او يو فلسطينی د يهوديانو له يوه ميشت ځای سره نژدې وژل شوي دي.

د راپورونو له مخې د تاوتريخوالي په تېرو دوو مياشتو کې ۱۵ اسراييليان او لسګونه فلسطينيان وژل شوي دي.

ډېری فلسطينيان چې پر اسراييليانو يې د چاقوګانو او چړو وژونکي ګوزارونه کړي د قربانيانو او يا هم د امنيتي ځواکونو له لوري وژل شوي دي.

نور فلسطينيان په غزه کې پر پوله د تاوتريخوالي له امله د اسراييلو له امنيتي ځواکونو سره په نښتو کې وژل شوي دي.

د پنجشنبې پر ورځ لومړنی بريد د تل ابيب ښار سويل کې له ګڼې ګوڼې په يوه ډک مارکېټ کې وشو.

د حماس غورځنګ له لوري پر ټويټر يوه خپاره شوي پيغام کې د تل ابيب بريدونو ستاينه شوې او هغه يې ''اتل بريدونه'' بللي دي.

په پيغام کې بريدګرو ته لارښوونه شوې، چې ''خپلو بريدونو ته همداسې دوام ورکړي.''

ورته مطالب