اوس به ړانده هم قرانکريم لوستلى شي!

د انځور حقوق Shivanand Giri
Image caption نفيسې د دوه نيمو کلونو له هڅو وروسته په ٩٦٥ مخونو د "برايل" په بڼه ټول قرانکريم ليکلى دى

په هندوستان کې يوې ښوونکې چې خپله په سترگومعذوره ده د قرانکريم يوه داسې ليکلې نسخه چمتو کړې ده چې نابينا وگړو ته د قران شريف لوستل شوني کوي.

دغه ډول ليکنې ته چې په انگليسي ژبه "برايل" وايي متن د نښو او لوړو تورو سره ليکل کېږي، بيا هغه کسان چې نشي ليدلی د په گوتو په محسوسولو سره هغه لوستلى شي.

دا ښوونکې، نفيسه ترين، د هندوستان د ختيځ ايالت بېهار جارکنډ په يوه ښوونځي کې د هندي ژبې تدريس کوي.

دې د دوه نيمو کالونو له هڅو وروسته په ٩٦٥ مخونو د "برايل" په بڼه ټول قرانکريم ليکلى دى.

نفيسه وايي کله چې دې د قرانکريم تلاوت کولو هغه به ډېرو ستونزو سره مخامخ کېده، ځکه يې په دې بڼه د نابينا وگړو لپاه د قرانکريم د نسخې د برابرولو اراده وکړه.

نفيسه ترين په ډيلي کې د کمپيوټر ساينس زده کړې کړې دي. نوموړې وايي چې کله يې د قرانکريم زده کول غوښتل لومړى داسې څوک نه و چې زده کړه ورڅخه وکړي، خو وروسته د محمد تسليم په نوم د قرانکريم يو حافظ څخه يې د قران شريف زده کړه پيل کړه، او د همدې حافظ د څارنې لاندې يې د "برايل" په بڼه د قرانکريم د نسخې چمتو کول پيل کړل.

په دې برخه کې هېڅ يوۀ مذهبي سازمان يا حکومتي ادارې هغې سره مالي مرسته نه ده کړې.

د انځور حقوق Shivanand Giri
Image caption نفيسه ترين، د هندوستان د ختيځ ايالت بېهار جارکنډ په يوه ښوونځي کې د هندي ژبې تدريس کوي.

خو اوس هغه وايي چې په لويه اندازه د دې نسخې چاپول غواړي. نفيسه ترين دې ته انتظار کوي چې دې لړ کې ورسره څوک يا کومه اداره مرسته وکړي چې په دې ډول ډېرو خلکو ته د دې د هڅې گټه ورسېږي.

خو نوموړې زياتوي که څوک يې مرستې ته راوړاندې نه شي نو خپله يې د خپرولو اراده لري.

د نفيسې پلار محمد مختار وايي "کله چې دا نسخه بشپړه شوه د بېلابېلو مدرسو او جوماتونو مشرانو او امامانو په مخ کې نفيسې خپله چمتو شوې نسخه ولوستله، او ټولو تاييد کړه".

د سيمې يو مفتي مولوي محمد منصور وايي"هغه څه چې د سترگو لرونکو ونه شو کړى دې نجلۍ هغه ترسره کړ، بې له شکه هغې يو ستر کار کړى دى".