ظریف: د سوریې په باب له عربستان سره همکارۍ ته چمتو یو

ظریف د انځور حقوق Getty

د ایران د بهرنیو چارو وزیر جواد ظریف، چې دا مهال د جرمني مونیخ امنیتي کنفرانس کې دی، ویلي ایران د سوریې په باب له عربستان سره همکارۍ ته چمتو دی.

جواد ظریف وايي هیله یې دا ده چې د ''مونیخ خبرې سوریه کې د انساني ناورین پای ته رسېدو لامل وګرځي''.

ښاغلي ظریف د مونیخ امنیتي کنفرانس کې وویل ''ایران او سعودي عربستان په سوریه کې مشترکې ګټې لري چې ددغو ګټو ساتلو لپاره باید یو او بل ته د همکارۍ لاسونه ورکړي''.

په وروستیو کلونو کې د ایران او عربستان ترمنځ اړیکې د سوریې اړوندو مسلو پر سر ترینګلې شوې، چې اوسمهال د دواړو هېوادونو سیاسي اړیکي غوڅ شوي دي.

د ایران او عربستان اړیکي وروسته تر هغه ډېر ترینګلي شول، چې سعودي عربستان یو شیعه مخالف ملا اعدام کړ، په ایران کې غوسه شویو شیعه ګانو د عربستان پر دیپلوماتیکو ځایونو بریدونه وکړل او عربستان اړ شو چې له ایران سره خپل سیاسي او سوداګریز اړیکي غوڅ کړي.

د ښاغلي ظریف په وینا، تهران له سعودي عربستان او ترکیې سره د ستونزمنو مسلو د حل لپاره لېواله دی.

تېره ورځ، ایران ویلي وو چې ترکیه دې ایران ته د ځان نژدې کولو هڅه نه کوي.

عربستان څو ورځې وړاندې، سوریې ته د خپلو ځواکونو د استولو هوډ ښودلی و، خو ایران یې دا ګام ناسم ګڼلی و، خو امریکا د سعودي عربستان ددغه ګام هرکلی کړی و.

ورته مطالب