نيويارک ټايمز: طالبانو پر لښکرګاه کړۍ تنګه کړې

نيويارک ټايمز:

د ورځپاڼې سرليک وايي افغان طالبانو د هلمند پر مرکز کړۍ تنگه کړې.

ورځپاڼه زياتوي چې طالب اورپکو پرون هغه مهال ١٥ پوليس ووژل چې دوه پوستې يې ونيولې. ورځپاڼې د ځينو ځايي چارواکو په وينا ليکلي چې له دې سره پر ولايتي مرکز فشار ډېر شوى.

ورځپاڼه د يوۀ چارواکي له خوله چې نه يې غوښتل نوم يې واخيستل شي ليکي که حکومت ژر اقدام ونکړي ښايي يوه غميزه را منځته شي.

گارډين:

د انځور حقوق AFP
Image caption ورځپاڼه ليکي لومړي وزير دا شرموونکې څرگندونې د ملکې الېزابېټ د ٩٠ زوکړې په لمانځغونډه کې وکړې.

د گارډين ننۍ گڼې سرليک وايي د ډېوېډ کامرون له خوله ووتل چې افغانستان او نايجيريا ښايي تر ټولو فاسد هېوادونه وي.

ورځپاڼه ليکي لومړي وزير دا شرموونکې څرگندونې د ملکې الېزابېټ د ٩٠ زوکړې په لمانځغونډه کې وکړې.

د گارډين په وينا د بريتانيا د لومړي وزير دغه راز خبرې د هغو مرستو په تړاو هم پوښتنې را پورته کوي چې بريتانيا له افغانستان او نايجيريا سره کړي.

ورځپاڼه وايي په ٢٠١٤ م کال کې له افغانستان سره د ١٩٨ ميليون پونډو او له نايجيريا سره ٢٣٧ ميليون پونډو په ارزښت د بريتانيا له لوري مرستې شوې دي.

ورځپاڼه وايي دا لومړى ځل نه دى چې لومړي وزير کيمرون له ملکې سره په تړاو په بې احتياطۍ چلند کړى. د ښاغلي کامرون وياند له افغانستان او نايجيريا سره د بريتانيا د مرستو په تړاو ويلي چې مخامخ د دغو هېوادونو حکومتونو ته په لاس نه ورکول کېږي.

د لومړي وزير وياند زياته کړې د دغو دواړو هېوادونو مشرانو ته ځکه د فساد په وړاندې مبارزې سرمشريزه کې د گدون بلنه ورکړل شوې چې د فساد په وړاندې مبارزه کوي او بريتانيا له دوى سره اوږه اوږه ولاړه ده.

واشنگټن پوست:

دې ورځپاڼې د افغان او امريکايي ځواکونو هغو عملياتو ته کتنه کړې چې په ترځ کې يې د پاکستان د پخواني لومړي وزير يوسف رضا گېلاني زوى علي رضا گېلاني د القاعدې له منگولو وژغورل شو.

ورځپاڼې ليکلي افغان او امريکايي ځواکونو د سې شنبې په ورځ د ښاغلي گيلاني زوى چې له دريو کلونو راهيسې يرغمل و، له القاعدې سره له يوې تړلې ډلې خلاص کړ.

د ورځپاڼې په وينا د افغان او امريکايي ځواکونو دغه بريالى ماموريت د ډيورند کرښې دواړو غاړو ته خوښۍ را وټوکولې.

ورځپاڼه وايي دا بريا د افغان ځواکونو پر وړتيا د تاييد يو مهر دى، چې دوى د ترهگرۍ په وړاندې جگړه کې د ښه والي په لور گام اخلي

ډان:

د انځور حقوق AFP
Image caption ډان ورځپاڼې هم د علي حيدر گيلاني ژغورنې ته کتنه کړې او داسې يو تصوير يې خپور کړى چې خلک د خوږو د ويشلو پر مهال ښيي.

ډان ورځپاڼې هم د علي حيدر گيلاني ژغورنې ته کتنه کړې او داسې يو تصوير يې خپور کړى چې خلک د خوږو د ويشلو پر مهال ښيي. ورځپاڼې همداراز يو شمېر پيغامونه خپاره کړي دي چې خلکو پر فېسبوک او ټوېټر د ښاغلي گيلاني کورنۍ ته ليکلي.