داعش ډلې ومنله چې عمر الشیشاني وژل شوی

د انځور حقوق AFP

څو میاشتې وروسته له هغه چې امریکایي چارواکو وویل، د اسلامي دولت (داعش) ډلې یو مهم مشر عمر الشیشاني یې په نښه کړی، داعش د هغه د مرګ پخلی کړی.

اعماق خبري اژانس چې د داعش خبرونه خپروي، لیکلي چې شیشاني عراق کې د موصل په سوېل کې د شرقاط ښار جګړه کې وژل شوی دی.

پنتاګون په مارچ میاشت کې ویلي و چې نوموړی د سوریې په شمال ختیځ کې امریکا په یوه هوایي برید کې په نښه شوی.

د هغه اصلي نوم تارخان باتیراشویلي و، خو په "عمر چیچني" مشهور و. الشیشاني وړاندې د سوریې په شمال کې د داعش پوځي مسؤول و.

ویل کېږي چې دغه سورږیری جهادي د داعش ډلې د مشر ابوبکر البغدادي ته له نژدیو سلاکارانو و.

دا خبر د اعماق اژانس له لارې خپور شوی چې ویل کېږي داعش یې له لارې خپل خبرونه خپروي. همدې اژانس په مارچ میاشت کې د پنتاګون ادعا رد کړې وه.

اعماق ویلي، شیشاني په داسې حال کې ووژل شو چې هڅه یې کوله له موصل نه عراقي ځواکونه په شا وتمبوي.

د انځور حقوق TWITTER
Image caption داعش پورې اړوند اعماق نومې خبري اژانس کې د الشیشاني د وژل کېدو بیړنی خبر

دغه خبري اژانس د هغه د وژل کېدو نېټه نه ده ښوولې، خو جزییات یې د پنتاګون د مارچ میاشتې له بیانیې سره په ټکر کې ده.

پنتاګون هغه مهال ویلي وو، برید د مارچ په څلورمه د سوریې شمال ختیځ الشدادي ښار ته نژدې شوی، چېرته چې نوموړی د داعش سیمه ییزو ځواکونو د پیاوړي کولو لپاره تللی و.

خو وروسته د امریکايي ځواکونو یوه ویاند ویلي، عمر الشیشاني ښایي د امریکا بې پیلوټه الوتکې له بریده روغ وتلی وي.

امریکا تېر کال د الشیشاني پرسر د ۵ میلیون ډالرو جایزه اعلان کړه.

اعماق راپور ورکړی چې الشیشاني څو مهم پوځي پوسټونه لرل، یو یې داعش کې د "جګړې وزیر" و.

الشیشاني د "اسلامي دولت" د شورا غړی و، چې په ۲۰۱۴ کال د داعش له خوا په یوه خپره شوې وېډیو کې د دغې ډلې د پوځي قومندان په توګه معرفي شوی.

ورته مطالب