کشمير کې ګرځبنديز: د ماشوم جنازې ته زرګونه خلک راغونډ شوي وو

د انځور حقوق AFP

د هندۍ غاړې کشمير په نژدې ټولو برخو کې ګرځبندیز لګول شوی. دا ګام وروسته له هغه واخیستل شو چې په سرینګر کې د ښوونځي د یوه زده کوونکي جسد د مرميو له ټپونو سره وموندل شو.

د ناصر شفيع په نامه دغه ماشوم د تېرې جمعې په ورځ لادرکه شوی و چې د شنبې (۱۷ سپټمبر) په ورځ يې مړی وموندل شو.

د راپورونو له مخې د وژل شوي ماشوم عمر ۱۱ کاله ښودل شوی.

د ګرځبنديز سربېره هم د نوموړي ماشوم د جنازې په مراسمو کې په زرګونو کسانو ګډون وکړ.

راپورونه وايي پولیسو پر هغو کسانو چې د دغه ماشوم جنازې ته راټول شوي وو اوښلن ګاز وکارول.

که څه هم حکومت ویلي وو چې د بېلتون غوښتوونکو مظاهره چیانو د کنټرولو لپاره به له نورو لارو کار اخلي خو امنیتي ځواکونه پر مظاهره چیانو ډزې کوي.

ويل کېږی په کشمير کې انټرنیټي خدمتونه هم ځنډول شوي دي.

د روان کال د جولای پر اتمه د يوې اورپکې ډلې مشر برهان واني له وژل کېدو وروسته په کشمير کې حالات خراب شوي ځکه خو امنيتي چارواکو د لاريونونو او اعتراضونو د مخنيوي په موخه ګرځبنديز لګولی دی.

د انځور حقوق AP
Image caption د هند تر ولکې لاندې کشمير په ډېرو برخو کې ګرځبندیز لګېدلی دی

په تېرو څو اوونيو کې پوليسو په دغه سيمه کې په لوی شمېر کسان نيولي چې له امله يې د خلکو غوسه راپارولې ده.

د برهان واني له مړينې وروسته په لاريونو او اعتراضونو کې يو شمېر کسان وژل شوی دی، د يوې شمېرې له مخې تراوسه له ۷ زرو ډېر کسان چې ډېری يې نوي ځوانان دي په دغو پېښو کې ټپيان شوي دي.

ورته مطالب