Action Against Hunger: Nigerian Gofment don dey follow kidnappers of Aid workers negotiate - Garba Shehu

A still taken from a video showing a kidnapped aid workers, and five men believed to be her colleagues. They are all sitting on mats in front of tarpaulin. Image copyright AFP
Image example Di video show one aid worker, wey give her name as Grace, dey ask for help from international community

Di Nigerian gofment don tok say dem don dey follow pipo wey kidnap six aid workers for Borno State discuss.

Garba Shehu wey bi Nigerian President tok tok pesin tell BBC dis one on Thursday come add say gofment dey hope di terrorists wey carri di aid workers go soon free dem.

One video don show as six aid workers dey beg gofment to come release dem from terrorists hand for northeast Nigeria.

One woman inside di video tok say dem attack dem, cari dem go area wey dem no know.

Di aid agency Action Against Hunger say dem don identify six of dia workers for di video. One of di aid workers wey call herself Grace, wear blue hijab and five men wey fit be her fellow workers bin dey wit her.

She dey hala for gofment and di international community to do sometin sharp sharp, make dem gain dia freedom from di kidnappers hand.

Garba Shehu tweet after di video land say goment dey make contacts, in di hope say di kidnappers go see reason to not visit hardship or even harm dis innocent pipo.

Early dis week, Action Against Hunger bin release statement wia dem say pipo bin attack some of dia moto wey bin dey go Damasak, Borno state. Di aid agency say dem kill one of dia drivers and di rest of di team dey miss.

Na mostly Boko Haram and di Islamic State of West Africa Province (ISWAP) pipo dey link to dis kain attacks for northern Nigeria.

Nigerian military dey claim say dem don nearly stop attacks from di groups. But militants still dey active, dey attack di region.

Topics Wey Dem Resemble

Another thing we de for inside dis tori