Deziani Alison-Madueke don become Dominica citizen or official of Dominica? - Dis na wetin we sabi

  • Damilola Banjo & Princess Igho Williams
  • Broadcast Journalist, Pidgin Service, Lagos
Diezani Alison-Madueke

Wia dis foto come from, DIETER NAGL/Getty Images

Wetin we call dis foto,

Diezani dey face corruption charges for different kontries aside from Nigeria

Deziani Alison-Madueke, one former Minister Of Petroleum Resources for Nigeria, wey dey face corruption accuse from authorities for di West African kontri don enta di minds of pipo again .

Dis time, some local media and pipo for social media begin dey circulate di news say di former minister wey currently dey United Kingdom, don become citizen of Dominica for Caribbean.

Di investigation connect Prime Minister of Dominica Roosevelt Skerrit and Allison-Madueke to one apartment for New York wey cost $2.2 million.

Dem bin suggest say na Nigeria former minister buy di big apartment and di apartment na payment for di diplomatic passport.

Dis report bin comot since November 2019 and madam Deziani Alison-Madueke don deny di report tey-tey.

BBC Pidgin no fit confam now now if new development don dey ontop di matter wey make Nigerians dey talk about am again.

Wetin be diplomatic passport?

Diplomatic passport na international document wey wealthy and rick individual fit get from kontris and e get plenty benefit.

Plenty kontris for Africa, Asian and di Caribbean don chop criticism say dem bi dey sell diplomatic passport wey fit protect rich pipo from prosecution and checks by police.

Pesin wey dey collect diplomatic passport most times no be citizen of di kontri wey dey give di passport as di case of Allison-Madueke and di Dominica diplomatic passport, one expert tok.

Diplomatic passport get benefit like say e dey protect fraudulent pipo from sanction and dem fit do anytin wey dem like for dia host kontri and anywhere for di world.

Di passport go also allow dem carry wetin dem dey call diplomatic bag wey be say security pipo no go fit check and dem no fit seize am. Dis mean say security no go search dia bag for airport and some of dem fit use am smuggle illegal tins.

Dem also enjoy tax waiver for many tins wey dem dey buy with dia diplomatic passport.

Wia dis foto come from, SAMUEL KUBANI

Wetin we call dis foto,

Diezani still dey face corruption case for London

Madam Diezani wey don dey UK since 2015, dey under investigation for money laundering dia, while Nigeria corruption police - Economic and Financial Crimes Commission (EFCC) don name her for different corruption trials.

"Dis year we must get her because dem no get reason to keep her. Dem neva take her go court and we dey di fifth year, why we go dey investigate one mata for five years?" EFCC oga Ibrahim Magu tok for January 2020.

Wetin be di accuse wey EFCC dey sama against Madam Diezani?

Dis mata first start for 2014, wen di Nigeria Central Bank Governor for dat time, Sanusi Lamido hala say $20bn of oil money dey miss wen Madam Diezani be oil minister, but she deny am dat time.

Later, di former minister come dey among three defendants wey EFCC drag go court on top three count charges

Di accuse be say dem deploy ova N362million derive from one $115m slush fund to influence di result of di 2015 presidential elections take favour di candidate of di party wey dey rule den, dat na People's democratic party, PDP.

Since den EFCC don secure court order to seize some of madam Diezani property plus including her Jewellery wey reach $40m and convict odas wey benefit from di $115m slush fund.

Wia dis foto come from, WOLE EMMANUEL

Which oda Kontri Madam Diezani get case to answer?

Madam Alison-Madueke dey face anoda mata of money laundering and acquisition of properties wey dey against her for UK court.

For October 2015, di UK National Crime Agency arrest her as part of dia investigation on top bribery and money laundering case.

Authorities for America don also dey put eye for her bodi on top different multi-billion dollar fraud and money laundering offences wey dem dey accuse her for.

For July 2017, US make move to seize $144m of assets, including one 200-foot yacht and big house for Manhattan; dem say na fruits of international bribery scheme wey she dey involve in.

Dem say two Nigerian oil men, Kolawole Aluko and Olajide Omokore, join oda bribe Mrs Alison-Madueke to win oil contracts.