National identification number: Why Nigeria NIMC remove dia mobile app from Apple and Play Store

National Identity Card na important identification document for Nigeria

Wia dis foto come from, TechEconomy

Wetin we call dis foto,

If you get NIN you fit buy land for FCT Abuja

The National Identity Management Commission (NIMC) don comot dia mobile app from Apple Store and Google Play Store, according to informate from di tok-tok person of di organisation.

BBC Pidgin also check di two mobile application stores and confam say di app no dey dia again.

Wia dis foto come from, Google Play Store

Di commission tok tok person, Kayode Adegoke, tell BBC Pidgin say di application never ready for use as dem still dey work on am to ensure say pipo date dey secure.

Over di weekend, many Nigerians begin dey download dia National Identity Card from di mobile application wen informate reach Twitter say dem fit download from di app.

One senior special assistant to President Muhammadu Buhari, Ajuri Ngelale, also tweet am. Although im don delete di tweet from him handle, di foot print still dey Google search engine.

Wia dis foto come from, Google

Also, Ngelale also retweet another Twitter user, Jerry Durojaiye, wey announce say im download im own ID card "in less dan 3 minutes".

Wia dis foto come from, Twitter/Ngelale

Oda pipo wey use di app also come Twitter announce am.

However, soon after pipo don start to dey jubilate, oda dey discover say di application get plenty wrong informate. Some pipo complain say im dey bring out wrong name and picture for dem.

"Di app still dey test stage. Di plan na for us to confam all di issues and get am right. Wen we con don ready, we go officially communicate to Nigerians say make dem download am", Adegoke tell BBC Pidgin.

Adegoke also say di confusion fit come from di announcement wey di Ministry of interior make about digital identity.

Wetin Ministry of Interior announce?

On August 13, 2020, Nigeria Minister of Interior, Rauf Aregbesola, bin announce say goment don begin process to join data of Nigerians together for one place with di use of di National Identification Number (NIN).

Dis informate come after di minister president report of di "Committee on Citizen Data Management and Harmonization to President Muhammadu Buhari".

Dis report address issue wey make di US goment put restriction of visa for Nigerians. One of di recommendation of committee wey put di report togeda na di use of NIN to make sure say goment fit collect data of everyone and keep togeda for one place.

How you fit get NIN

Due to Covid-19 pandemic, di centre for registration don close but Adegoke tell BBC Pidgin say state offices don begin small-small operations.

Dis na how to apply according to informate for di commission website.

Wia dis foto come from, NIMC

Wia dis foto come from, NIMC