IPOB sit-at-home order: Anambra Willie Obiano enta road to stop sit-at-home order

Chief Willie Obiano

Wia dis foto come from, Chief Willie Obiano/Facebook

Anambra State ogas-at-di-top bin enta road try to stop di sit-at-home order wey paralyze di commercial town.

Na di order wey di proscribed Indigenous Pipo of Biafra [Ipob] bin give to hold on Monday.

Govnor Willy Obiano visit banks and markets for di state capital Awka and di economic capital Onitsha to monitor.

Di Govnor go to encourage everybody for di state make dem go do dia business becos "goment go protect dem."

"We get a lot of support from di police, army, navy and dem dey seriously patrol everywia, so nobody go disturb anybody."

Wia dis foto come from, ANAMBRA STATE GOVERNMENT

Di Ipob sit-at-home order bin affect economic activities for di state as banks lock dia doors to customers and transporters refuse to move.

Although traders come out for business, dem refuse to open dia shops to sell market.

From im observation, di govnor say although pipo dey go about dia business, but dem dey scanty.

"I see say pipo dey go about dia business, but in very skeletal way, e no suppose happun and we wan encourage pipo to come out."

Wia dis foto come from, Anambra State Government House

Banks for di areas bin dey open and di goment assure di citizens say di security for di area dey very good and safe.

Di pipo later come out to continue dia activities afta di govnor ginger dem.

Di weekly Monday sit at home order na to protest di continued arrest and prosecution of Biafra activist Nnamdi Kanu.