Authorities find at least 46 deadbodi inside abandoned lorry for Texas

One lorry

Wia dis foto come from, Getty Images

Dem don find deadibodi of at least 46 pipo wey dem believe to be migrant inside one abandoned lorry for di outskirt of San Antonio, Texas.

One fire official say dem cari Sixteen pipo including four children go  hospital.

Di survivors dey "hot to the touch" and dem dey suffer from heat stroke and heat exhaustion.

San Antonio, wey be 250km (150 miles) from di US-Mexican border, na di major transit route for pipo smugglers.

Human traffickers dey always use lorries to transport migrants wey no dey documented afta meeting dem for remote areas once dem don manage to cross enta di United States.

"Dem get families...and e fit be say na better life dem dey gtry find," San Antonio Mayor Ron Nirenberg tok.

"Na nothing short of a horrific, human tragedy."

Emergency responders first enta di scene at about 18:00 local time (23:00 GMT) after responding to reports of one dead body, San Antonio Fire Chief Charles Hood bin tell reporters.

"We no suppose open up a truck and see stacks of bodies inside. None of us come to work imagining that," he tok.

He add say di vehicle, wey dem bin abandon by im driver, no get air conditioning wey dey work and no drinking water also dey inside am.

Mexico's Foreign Minister, Marcelo Ebrard, tok say two Guatemalans dey among di pipo wey dem carry go hospital.

Di nationalities of di oda victims no dey clear now.

Dem dey hold three pipo for custody and dem don also hand di investigate over to federal agents.

Wia dis foto come from, Getty Images

Wetin we call dis foto,

Dem dey hold three pipo for custody and dem don also hand di investigate over to federal agents

Dem don send Mexican Consul General Rubén Minutti to di scene and di consulate for San Antonio tok say dem go provide "all di support" if Mexican citizens dey among di pipo wey die.

Edward Reyna, wey be security guard for one lumber yard just yards away, say e no dey surprise to arrive for im night shift and hear di news.

E say e don loss count of di times wey e don see migrants jumping off di train wey pass right next to where dem find di lorry.

"I bin tink say sooner or later, somebody go dey hurt," Oga Reyna tok.

"Di cartels wey bring dem over no care about dem."

Dis no be di first time wey something like dis go happun for San Antonio, but e no reach dis magnitude.

For 2017, dem find deadi bodi of 10 immigrants inside a similar tractor trailer outside one Walmart - also for di city's south side.

San Antonio's far south side na corridor with two main highways wey connect di city to Texas border towns.

Mostly rural communities, few junkyards and a handful of developing neighbourhoods for dis part of San Antonio make am easy for a lorry dis size to go unnoticed - until dem no fit.